Greiðir bílaleigu 2.000 evrur eftir að hafa ekið á kind

Þýskur maður, sem staddur er hér á landi, þarf að greiða bílaleigu 2.000 evrur vegna skemmda sem bíll leigunnar varð fyrir er kind hljóp í veg fyrir bíl hans þar sem kaskótryggingar bifreiða ná ekki yfir tjón sem dýr valda.

Justin Voff hefur dvalið hér á landi síðustu fjóra mánuði sem starfsnemi á dagskrárdeild RIFF. Helgar sínar hefur hann notað til þess að ferðast um landið og hefur hann leigt bíla hjá hinum ýmsu bílaleigum. Um síðustu helgi var hann á ferð í Norðurárdal er kind með tvö lömb hljóp í veg fyrir bíl hans.

Sjá einnig: Hestar stórskemmdu bíla graunlausra veiðimanna

„Það var enginn annar möguleiki en að keyra á hana,“ segir Justin en atvikið átti sér stað á frídegi verslunarmanna er hann var á leið niður af Holtavörðuheiði. Tvö lömb fylgdu kindinni en ærin drapst við áreksturinn.

Justin hringdi á lögregluna sem kom og liðsinnti honum. Bíllinn var sóttur og hann tók rútuna til Reykjavíkur. Í dag átti hann fund með fulltrúum bílaleigunnar og fékk að vita að bíllinn væri ekki tryggður fyrir tjóni sem þessu. Þarf hann því að greiða 2.000 evrur, tæpar 300.000 krónur, vegna þessa.

„Mér finnst þetta hálfblóðugt þó ég sé ekki bílasérfræðingur. Mér skildist á þeim að bíllinn væri ekki það skemmdur og gæti verið kominn á götuna aftur eftir helgi. Að auki er nærri fjórfalt dýrara að leigja bíl núna heldur en í vor,“ segir Justin. Hann segir að í vor hafi dagleiga kostað 35 evrur að leigja bílinn en nú sé það 120 evrur.

Ákvæði sem er hjá öllum bílaleigum

Bíllinn sem Justin leigði var Toyota Yaris sem hann leigði af Sad Cars bílaleigunni. Sigurður Smári Gylfason er eigandi Sad Cars og kannast til málsins.

„Hann virðist hafa verið nálægt hámarkshraða er kindin hljóp fyrir bílinn og það er alveg spurning hvort það borgi sig að gera við hann,“ segir Sigurður. Brettið, stuðarinn og húddið er allt ónýtt og að auki er vatnskassinn sprunginn. „Bíllinn er í raun ónýtur.“

„Þetta er víst svona, og það er ekkert bundið við okkur, að tjón af völdum dýra fellur ekki undir trygginguna. Mig rámar til dæmis í það fyrir einhverjum árum að hestar hafi verið að naga bíla og það fékkst ekki bætt,“ segir Sigurður.

Hann segir að verð hjá bílaleigum séu árstíðabundin og hafi alltaf verið. „Ég held að allar bílaleigur tvöfaldi verð yfir sumartímann hið minnsta. Þannig hefur það verið í mörg ár.“