Nýliðarnir búnir að finna sér Kana

Nýliðar FSu í Domino's deild karla í körfubolta eru búnir að finna sér erlendan leikmann fyrir átökin næsta vetur. Þetta kemur fram á heimasíðu FSu.

Leikmaðurinn sem um ræðir heitir Chris Anderson og er 22 ára gamall Bandaríkjamaður. Hann lék með Louisiana Tech háskólanum og var með rúm 12 stig og sex fráköst að meðaltali í leik á lokaári sínu með liðinu.

Anderson, sem er tæpir tveir metrar á hæð, lék sem atvinnumaður í Mexíkó á síðasta tímabili.

„Chris kemur til okkar með góð meðmæli frá þjálfurum sínum og þá sérlega frá Michael White sem þjálfaði hann í gegnum háskólann en hefur nú tekið við starfi Florida University af Billy Donovan sem hefur tekið við Oklahoma Thunder í NBA deildinni,“ er haft eftir Erik Olson, þjálfara FSu, á heimasíðu félagsins.

„Í gegnum samband okkar við Michael White gátum við skoðað Chris vel en hann spilaði stórt hlutverk í sigursælu liði Louisiana Tech og er þekktur fyrir að aðlagast vel mismunandi hlutverkum, hann er stór og kraftmikill íþróttamaður.

„Það sem heillaði mig mest við hann er hversu mikinn kraft hann setur í bæði vörn og sókn. Við erum vongóðir um að Chris eigi eftir að passa vel inn hjá FSu og í íslenskan körfubolta.“

FSu hefur leik í Domino's deildinni gegn Grindavík á heimavelli 15. október næstkomandi.