Marko: Undirvagninn hluti af vandanum

Helmut Marko, ráðgjafi Red Bull viðurkennir undirvanginn á RB11 eigi jafn mikinn þátt í slökum árangri liðsins og vélin frá Renault.

Marko átti í orðaskaki við Cyril Abitebaoul, hjá Renault í gegnum fjölmiðla í síðustu vikurnar.

Adrian Newey, yfirhönnuður Red Bull blandaði sér í skak þeirra félaga og sagði að vélin þyrfti að taka framförum. Abiteboul brást illa við og kallaði Newey lygara og sagði að undirvagn liðsins væri helsta vandamál þess.

Abiteboul sagði árangur Toro Rosso liðsins sanna mál sitt. Toro Rosso nota einnig Renault vél og er liðið búið að skáka stóra bróðir í báðum keppnum tímabilsins.

Marko hefur nú viðurkennt að Red Bull þurfi að líta í eigin barm og leysa eigin vandamál.

„Úrslitin á Sepang brautinni voru óheppileg fyrir Red Bull, en það sakar ekki það er nauðsynlegt að fara að vakna í verksmiðjunni í Englandi,“ sagði Marko.

„Undirvagninn virkar ekki alveg eins og skyldi,“ sagði Marko.

„Við þurfum að einbeita okkur að okkar vandamálum og afrgreiða þau í komandi keppnum,“ sagði Marko að lokum.

Nýlegur árangur Ferrari hefur vakið von í brjósti Red Bull um að stór framfarastökk séu möguleg.