Þrír skiptinemar hlupu í Color Run: "Mun meiri skemmtun heldur en íþróttakeppni“

Þrír íslenskir nemar í Kaliforníu keyrðu til Las Vegas í lok febrúar til að hlaupa í The Color Run sem fram fór þar í borg.

„Við heyrðum af þessu hlaupi sem verður á Íslandi í sumar og áttuðum okkur á því að við myndum ekki vera komin heim þegar hlaupið fer fram,“ segir Guðbergur Ingi Ástvaldsson sem er í skiptinámi við University of California at Santa Barbara þennan veturinn ásamt Jóhönnu Karen Birgisdóttur kærustu sinni.

„Við fórum inn á heimasíðu The Color Run og sáum auglýst hlaupið í Las Vegas. Okkur fannst tilvalið að fara og skoða borgina og næturlífið í leiðinni,“ bætir Jóhanna við en hún stundar fjarnám við Háskóla Íslands.

Eitt stórt, hamingjusamt partí

Alls voru á bilinu 7-8.000 manns sem hlupu í Las Vegas en gert er ráð fyrir samskonar fjölda í hlaupinu sem fram fer hér á landi. „Ég upplifði hlaupið eins og eitt stórt og hamingjusamt partí, þar sem allur aldur getur tekið þátt og notið sín. Það var svo mikil gleði og hamingja í loftinu að maður gat ekki annað en smitast. Ég var brosandi hringinn allan tímann,“ segir Anna Hafþórsdóttir sem einnig er í skiptinámi í tölvunarfræði við sama skóla og hljóp ásamt þeim Guðbergi og Jóhönnu í Las Vegas.

„Þetta var minna um að hlaupa en ég hafði haldið. Mjög margir löbbuðu þessa 5 km. Þetta virðist snúast meira um upplifunina heldur en að vera góður í að hlaupa.“ The Color Run er ekki hefðbundið kapphlaup heldur er hlaupið í gegnum litarhlið á 1 km fresti þar sem skvett er á hlaupara litapúðri í öllum regnbogans litum.

„Ég vissi ekki að liturinn væri í duft formi, þannig að það kom mér á óvart. Ég bjóst við hálfgerðri málningu og var við öllu búin. Það er eitthvað svo fáranlega skemmtilegt við það að láta fólk kasta yfir sig lit og glimmeri á meðan maður hleypur í gegnum hrúgi af fólki sem gefur manni high five. Mér leið eins og krakka sem fær að hoppa í polla og drullumalla án þess að vera skammaður.“

Munu hlaupa á Íslandi haldi hlaupið áfram

„Á tímabili var ég að velta mér upp úr lit á götunni. Þetta var mun meira partý og gleði heldur en íþróttaviðburður. Ég svitnaði álíka mikið í partýinu eftir á og við að hlaupa. Þar var spiluð tónlist á risasviði, meiri litum spreyjað yfir mann og hlauparar að búa til litasprengjur. Það var mikið dansað og hoppað,“ segir Anna.

Jóhanna tekur undir með Önnu að það hafi komið á óvart hvað það voru margir sem löbbuðu. „Við vorum búin að tala um að koma okkur í gott form fyrir hlaupið og vorum búin að fara út að skokka hérna heima sem við hefðum ekkert þurft að gera. Það kom líka á óvart hvað það var auðvelt að hlaupa þessa fimm kílómetra. Við vorum ekki beint að spretta þetta og við hægðum á okkur í gegnum hliðin þar sem litnum er kastað á mann. Þetta var svo gaman og maður var alltaf svo spenntur að komast að næsta hliði að maður pældi ekki mikið í hlaupinu.“

The Color Run verður haldið í Los Angeles í júní og eru þremenningarnir staðráðnir að hlaupa aftur í því hlaupi. „Við verðum nýbúin í prófum þegar það er, væri gaman að fagna próflokum í L.A. röndóttur og sveittur. Ef þetta heldur áfram að vera haldið á Íslandi næstu árin mun ég líka pottþétt hlaupa á Íslandi,“ segir Anna að lokum.