Sigurður Ingi: Afnám tolla myndi kippa fótunum undan byggð hringinn í kringum landið

Sigurður Ingi Jóhannsson landbúnaðarráðherra segir að afnám tolla myndi kippa fótunum undan byggð hringinn í kringum landið en hann var í viðtali í útvarpsþættinum „Í bítið“ á Bylgjunni í morgun.

Aðspurður hvaða áhrif afnám tolla á landbúnaðarafurðir til Íslands sagði Sigurður Ingi: „Ætli það gæti ekki þýtt miðað við það sem menn voru að velta fyrir sér í nautgriparæktun og mjólkurframleiðsluna gæti það minnkað um 20, 30 jafnvel 40 prósent. Og þá sjái þið þá dreifingu sem búskapurinn hefur um landið og er undirstaða þess m.a. að það er gaman að keyra um landið og gaman fyrir túristana að koma og gaman fyrir túristana kaupa íslenskan mat. Það myndi svolítið kippa fótunum undan byggð hringinn í kringum landið,“ sagði Sigurður Ingi.

Segir umræðuna um sveppi „smá upphlaup“

Þá báru fréttir um skort á sveppum í landinu einnig á góma. Sjávarútvegs- og landbúnaðaráðuneytið hefur verið sakað um að draga lappirnar í að fella niður tolla á innflutta sveppi líkt og því ber að gera ef innlend framleiðsla annar ekki eftirspurn. Sveppaskortur hefur verið í landinu vegna framleiðslubrests hjá Flúðasveppum.



Sjá einnig: Embættismenn draga lappirnar í sveppum

Sigurður Ingi sagði umræðuna „smá upphlaup“ og bar saman tolla á sveppum á Íslandi og skyri til ESB.

„Staðreyndin er sú að þetta fyrirkomulag hefur verið við lýði síðan 2002 og síðan 2012 er 80 krónur verðtollur á sveppum. Þú mátt flytja inn eins mikið af sveppum og þú vilt en borgar 80 krónur á kílóið. Og til samanburðar af því það er alltaf látið í það skína öðru hvoru að tollar séu eitthvað sér íslenskt fyrirbæri þá erum við að flytja skyr inn á Evrópusambandið. Ef að við nýtum þennan tollkvóta þar alveg eins og menn nýta tollkvóta hér til íslands. Það sem er umfram tollkvótann þarf að borga 300 krónur á kílóið,“ sagði Sigurður Ingi.

Sigurður Ingi var einnig spurður hvers vegna verndartollar væru á vörum sem ekki væru framleiddar hér á landi t.d. Parmesan osti. Sigurður Ingi sagði að tollarnir væru vegna þess að matvæli væru í innbyrðis samkeppni. Þá sagði hann að Ísland hefði átt í viðræðum við ESB um opna tollkvóta. Ísland gæti þá komið flutt meira af skyri til ESB án þess að greiða 300 króna tollkvóta en íbúar ESB gætu á móti flutt inn landbúnaðarafurðir, þar á meðal hina ýmsu osta.

Segir nauthakk hafa hækkað við lækkun tolla

Vegna ummæla formanns Bændasamtakanna um helgina um hvort verslunareigendum væri treystandi til þess að skila lækkunum á tolli til neytenda sagðist Sigurður Ingi telja að verslunin væri fús og viljug til að gera eins vel og hún gæti.



Sjá einnig: Segir flest bend til þess að stórkaupmenn hugsi aðeins um eigin hag

Hins vegar sagði Sigurður Ingi að verð á hakki hefði hækkað við lækkun tolla. „En talandi um þennan tollkvóta á nautakjötinu, þessu hakkefni, þar sem  verðið var með verndartollum einhverjar 600-700 krónur en fór niður í 270 krónur. Heimsmarkaðsverðið á vörunni lækkaði um 15 prósent en hækkaði út í búð á Íslandi. En kannski var þetta bara einstakt tilfallandi tilfelli,“ sagði Sigurður Ingi.