Vantrú barst tilkynning um lögsókn vegna gríns

„Við reiknuðum ekki með því að eitthvað fólk myndi ekki halda að þetta væri grín, það kom okkur svolítið á óvart,“ segir Sindri Guðjónsson, formaður Vantrúar, um tilkynningu félagsins sem birtist í fjölmiðlum í dag.

Félagið sendi frá tilkynningu þar sem greint var frá ályktun stjórnar félagsins að frá og með 1. mars næstkomandi yrðu allir Íslendingar skráðir í Vantrú. Sindri segir þessa tilkynningu hafa verið merkta sem grín og því kom það félagsmönnum Vantrúar á óvart hve margir tóku þessu alvarlega.

„Við höfum fengið mjög mikið af pósti. Jafnvel eru dæmi um að menn hafi sent afrit af ökuskírteininu. Sumir hafa skráð börnin sín úr Vantrú og ófætt barn meira segja þegar þeir skrá sig úr félaginu,“ segir Sindri en félaginu barst einnig tilkynningu frá lögmanni um lögsókn.

„Það var eitthvað á þá leið að við hefðum ekki rétt á að skrá fólk í svona félög án þeirra samþykkis, sem er alveg hárrétt, og það væri eitthvað ónæði af því að skrá sig úr félaginu og hann myndi vilja fá einhvern kostnað endurgreiddan.“

Þessi tilkynning Vantrúar var háðsádeila á trúskráningu á Íslandi en þó að tilkynningin hafi verið merkt sem grín þá reyndu margir sem ekki höfðu skráð sig í Vantrú að segja sig úr félaginu vegna tilkynningarinnar og létu fylgja með afrit af persónuskilríkjum sínum. „Fólk gekk svo langt að senda slíkt. Hins vegar voru mun fleiri sem sendu póst og sögðu hversu fráleitt það væri að þeir væru beðnir um að senda okkur skilríki.“