Órói á vinnumarkaði hamlar stýrivaxtalækkun

Tilkynnt var um það í morgun að peningastefnunefnd Seðlabanka Íslands hefði ákveðið að halda stýrivöxtum bankans óbreyttum. Vextir verða því áfram 4,5%.

Samhliða kynningu á stýrivaxtaákvörðun bankans var kynning á nýju hefti Peningamála. Þar kemur fram að hagvöxtur í fyrra hafi verið minni en bankinn spáði í nóvember eða tvö prósent í stað tveggja komma níu prósenta. Hins vegar sé jákvætt að horfur eru á meiri vexti í ferðamannaiðnaði og útflutningi sjávarafurða og að viðskiptakjör batni. Því gerir Seðlabankinn ráð fyrir meiri hagvexti á árinu 2015 en í spá bankans frá því í nóvember. Áætlað er að hagvöxtur verði fjögur komma tuttugu og fimm prósent á þessu ári í stað þriggja komma fimm eins og spáð var.

Þá eru horfur á að verðbólga verði undir tveimur prósentum fram á næsta ár.

Í peningamálum kemur fram að efnahagshorfur sé að ýmsu leyti tvísýnni en áður. Annars vegar vegna lækkunar olíuverðs en óvíst sé hve langvinn sú þróun verði og hins vegar vegna ólgu á vinnumarkaði.

„Ef ekki væri framundan þessi áhætta, sem að við sjáum varðandi innlenda launaþróun, þá myndum við líklega lækka vexti,“ segir Arnór Sighvatsson, aðstoðarseðlabankastjóri.

Þannig að ef það væri ekki órói á vinnumarkaði, þá hefðuð þið lækkað vexti hér í dag?

„Það tel ég mjög líklegt, já,“ segir Arnór.



Peningastefnunefnd telji því rétt að staldra við þar til efnahagshorfur skýrast frekar, einkum varðandi launaþróun.

„Hinn möguleikinn er líka fyrir hendi að þetta snúist við og launaþróunin verði þannig að hún ýti undir verðbólguna. Þá getur niðurstaðan frekar orðið með þeim hætti að það þurfi að hækka vexti, frekar en lækka,“ segir Arnór.