Gatnakerfið í Reykjavík að hruni komið

Ólafur Kr. Guðmundsson, varaformaður FÍB, segir að hætta hafi skapast á höfuðborgarsvæðinu vegna viðhaldsleysis á gatnakerfinu. Hann segir að nauðsynlegt sé að grípa til aðgerða strax því á næsta ári verði ástandið orðið alvarlegt. Gatnakerfið allt sé hrunið.

„Hrun gatnakerfisins á höfuðborgarsvæðinu hófst núna um hátíðarnar. Ef við gerum ekki eitthvað í því þá verður það enn verra. En kannski það sem menn aðallega átti sig á í bleytu er að rásirnar eru fullar af vatni og menn hætta að sjá hvar þessar holur eru. Þannig að það þarf að passa sig og reyna að vera ekki ofan í rásunum og aka varlega með það í huga að þeir geti lent í harkalegum holum,“ sagði Ólafur í þættinum Reykjavík síðdegis í gær.

Heldur umhleypingasamt hefur verið á höfuðborgarsvæðinu að undanförnu og hitasveiflur víða. „Það sem gerist er að vatnið kemst ofan í rásirnar, þetta er orðið svo slitið. Vatnið liggur í þessum rásum, svo frýs þetta og kemst ofan í malbikið, í gegnum sprungur og þessi slitlagsskipti sem verða þegar slitið á efra laginu fer niður í næsta lag fyrir neðan. Þá kemst vatn þarna á milli. Saltið hefur líka þau áhrif að bindiefnið eyðist þannig að allt í einu þá brotnar það niður,“ segir hann.

„Þetta er akkúrat það sem er bein afleiðing af þessu viðhaldsleysi sem hefur verið undanfarin ár og held að flestir viðurkenni.“ 

Ólafur segir þetta eiga við flest allar götur á höfuðborgarsvæðinu og tekur sem dæmi Sæbraut, Vesturlandsveg, Bankastræti, Sóleyjargötu, Strandveg, Hverfisgötu og Grensásveg. Hann hefur þó ekki tilkynnt yfirvöldum formlega stöðuna en vonast til að umfjöllun um málið verði þeim hvatning. Þá biður hann fólk um að gæta sín í umferðinni og að hafa það í huga að gjóturnar leynist víða og auðveldlega geti illa farið. 

Hægt er að hlusta á viðtalið við Ólaf í heild í spilaranum hér fyrir neðan.