Formaður stjórnar Lífeyrissjóðs VR telur fjárfestingu í bönkunum betri nú en fyrir hrun

Stjórnarformaður Lífeyrissjóðs VR segir enn ekki ákveðið hvort sjóðurinn taki þátt í að kaupa Arion banka með öðrum lífeyrissjóðum. Ef að kaupum verði yrði eignarhlutur sjóðsins mun minni en hann var í bönkunum fyrir hrun.

Í Fréttablaðinu í dag er sagt frá því að þrír stærstu lífeyrissjóðir landsins, LSR, Gildi og Lífeyrissjóður VR sé að skoða möguleika á að kaupa Arion banka og hefðu fundað með slitastjórn Kaupþings sem á 87 prósent í bankanum í gær.

Lífeyrissjóðir landsins töpuðu um 480 milljörðum króna, sem svaraði þá til 12 ára iðgreiðsla sjóðsfélaga, á bankahruninu, meðal annars vegna eignarhluta sinna í bönkunum.

Ásta Rut Jónasóttir stjórnarformaður Lífeyrissjóðs VR segir að auðvitað hræði fortíðin í þessum efnum. Málið sé hins vegar komið mjög skammt á veg.

Það er bara búið að taka ákvörðun innan stjórnarinnar um að skoða þetta mál og möguleika á kaupum. Það er ekki komin nein ákvörðun um að kaupa því það er heldur ekki komið neitt verða eða neitt slíkt. Það er bara verið að skoða hvort slitastjórn Arion banka sé tilbúin að selja bankann. Það er ekki komið neitt lengra,“ segir Ásta Rut.

Ef af þessari fjárfestingu verði myndi það vera til langs tíma enda séu lífeyrissjóðirnir yfirleitt í langtíma fjárfestingum.

„Það sem er auðvitað mikilvægt að hafa í huga varðandi þessa fjárfestingu ef að yrði, er að auðvitað er bankinn í allt öðru rekstrarformi í dag en hann var. Og í rauninni í miklu einfaldara formi,“ segir Ásta Rut.

Ef að yrðu myndi eignarhlutur Lífeyrissjóðs VR verða miklu minni en hann var í bönkunum fyrir hrun.

„Auvitað eru allar fjárfestingar að einhverju leyti áhættusamar og þessi yrði ekkert undanskilin því. En við teljum engu að síður eins og bankinn er uppbyggður núna og eins og rekstur bankans er sé þetta mun minni áhætta en kannski var fyrir hrun,“ segir Ásta Rut.

Ef lífeyrissjóðirnir eignist Arion banka séu allir sammála um að bankinn færi á markað þannig að allir fjárfestar og almenningur gætu keypt hlut í bankanum. Hún ítrekar hins vegar að málið sé skammt á veg komið.

„Þetta er ekkert að fara að gerast á næstu vikum eða fyrir áramót. Eflaust verða einhverjar viðræður í gangi ennþá fyrir áramót. En það verði ekki einhver taktur í þessu fyrir en eftir áramót,“ segir Ásta Rut Jónasdóttir.