Matarkarfan gæti lækkað um tugi þúsunda

Matarkarfan gæti lækkað um allt að 23.423 krónur ef að tollar á svínakjöt, fuglakjöt, nautakjöt og unnar kartöfluvörur yrðu afnumdir. Þetta er á meðal þess sem kemur fram í viðauka við nýja skýrslu Félags atvinnurekenda um matartolla en fram kemur í viðaukanum að sú tala sem nefnd er hér sé nokkurri óvissu háð.

Segir meðal annars að líklegra sé en hitt að áhrif séu vanmetin og því geti afnám tolla haft mun jákvæðari áhrif á buddu neytenda.

Í skýrslunni sjálfri leggur Félag atvinnurekenda meðal annars til að almennir tollar á landbúnaðarvörum verði lækkaðir um 50 prósent og að tollar á svína-og alifuglakjöt verði afnumdir með öllu.

Sama er lagt til varðandi tolla á vörur sem ekki keppa við innlenda framleiðslu, til að mynda parmesanostur, dádýrakjöt, franskar kartöflur, pítsur og pasta.

Skýrsluna má sjá í heild sinni hér.