Hér eru aðstæður Össuri mótdrægar

Össur býr við mjög óeðlilegt ástand með þrjátíu prósent hlutafjár félagsins föst innan gjaldeyrishafta í Kauphöll Íslands, að mati stjórnenda félagsins.

Þó að stjórn félagsins sé orðin langþreytt á því rekstrarumhverfi sem það býr við hér hafi þó engar ákvarðanir verið teknar enn um flutning þess úr landi.

Þetta kom fram í máli Jóns Sigurðssonar, forstjóra Össurar, og Sveins Sölvasonar fjármálastjóra, á kynningarfundi með markaðsaðilum í gær vegna nýbirts ársuppgjörs félagsins.

„Það er auðvitað ljóst að við búum við umhverfi sem er alveg ákaflega sérstakt og okkur mótdrægt. Við höfum ekkert farið í grafgötur með það,“ segir Jón og rifjar upp að Niels Jacobsen, stjórnarformaður Össurar, hafi haldið reiðilestra um stöðuna á aðalfundum félagsins.

„Og þú náttúrlega veist aldrei hvenær þolinmæði þrýtur fyrr en það gerist.“

Sem dæmi um hversu önug staða Össurar væri hér innan hafta benti Jón á skráningu bréfa félagsins í kauphöll bæði hér og í Danmörku.

Þannig sé Össur um það bil þrítugasta stærsta fyrirtækið í dönsku kauphöllinni, en í um fimmtugasta sæti hvað varði söluhreyfingar bréfanna.

Ef tekin séu hlutabréfin sem hér eru skráð í kauphöll, nálægt þriðjungur bréfa félagsins, og söluhreyfingum þeirra bætt við tölurnar í dönsku kauphöllinni, þá væri félagið í þrítugasta sæti þar hvað varðaði seljanleika bréfanna.

„Þarna er ein birtingarmynd þess hversu skrítið það er að vera með hluta af hlutabréfum fyrirtækisins lokuð hér inni í gjaldeyrishöftum,“ segir Jón.

Þá bendir Sveinn Sölvason, fjármálastjóri Össurar, á að þótt Össur njóti allsherjarundanþágu frá gjaldeyrishöftunum hér og bein áhrif þeirra á daglegan rekstur félagins séu engin, þá sé staðan samt félaginu og hluthöfum þess kostnaðarsöm.

„Fjármögnun er flóknari, girða þarf íslenska móðurfélagið af og við fáum lánin inn í erlend dótturfélög,“ bendir hann. Sú staðreynd að Össur sé að upplagi íslenskt félag kosti peninga. Þótt fyrirtækið hafi náð hagstæðri fjármögnun þá hafi höftin áhrif.

Sveinn bendir á að vegna þess að Össur sé með 30 prósent hlutafjár félagsins skráð í Kauphöllina hér, innan gjaldeyrishafta, þá nýtist sá hluti ekki til fjármögnunar verkefna utan landsteinanna.

„Tækju íslenskir fjárfestar þátt í slíkum gjörningi, þá fengjum við inn krónur sem við getum ekki notað nema við reiðum okkur á einhvers konar undanþágur og í þeim málum er ekkert hægt að gefa sér,“ segir hann.

Jón Sigurðsson bætir við að ef félagið væri á leið inn í stór verkefni og vantaði peninga (sem hann áréttar þó að sé ekki raunin heldur eigi félagið fremur í vandræðum með að koma því fjármagni í vinnu sem það á) þá væri félagið í nákvæmlega sömu stöðu og Promens og yrði að yfirgefa landið.

„Það er ákveðinn efnahagslegur ómöguleiki í því fólginn að vera hér á Íslandi,“ segir Jón, en kveðst þó um leið vonast til þess að félagið verði hér áfram. 

Félagið í hnotskurn

Össur er eitt af stærstu fyrirtækjum landsins, alþjóðlegt fyrirtæki á heilbrigðissviði, sem hannar og framleiðir stoðtæki, spelkur og stuðningsvörur.

Fram kemur á vef félagsins að það sé annar stærsti stoðtækjaframleiðandi í heimi og leiðandi á sínu sviði.

Össur hf. er skráð í kauphöll Nasdaq í Kaupmannahöfn með megnið af sínu hlutafé og í Nasdaq Iceland með um 30 prósent hlutafjár.

Félagið sótti árið 2011 um afskráningu úr kauphöllinni hér, en kauphöllin ákvað að taka hlutabréf félagsins aftur til viðskipta, án samþykkis fyrirtækisins.