Jón Arnór: Er betri manneskja í dag

Jón Arnór Stefánsson, leikmaður íslenska körfuboltalandsliðsins og Unicaja Malaga á Spáni, segist gífurlega stoltur af því að vera kjörinn íþróttamaður ársins. Hið árlega kjör Samtaka íþróttafréttamanna fór fram í Gullhömrum í kvöld.

„Það er náttúrlega að komast á Evrópumótið. Það er risastund fyrir körfuboltann, fyrir mig persónulega og fyrir okkur strákana sem höfum verið að spila með liðinu í meiri en tíu ár. Ég held ég hafi verið í landsliðinu í fjórtán ár," sagði Jón Arnór í samtali við RÚV aðspurður hver væri hátindur ársins.

„Það er sætasta stundin á mínum ferli að ná þessum glæsta árangri með landsliðinu og með mínum vinum í landsliðinu. Það stendur klárlega upp úr en vonandi verður 2015 skemmtilega með Malaga."

„Ég er kominn hérna í ofsalega gott lið, er kominn aftur í Euroleague og er að upplifa þann "fíling" aftur. Ég er á mjög góðum stað í lífinu."

Jón Arnór spilaði ekki fyrsta leikinn gegn Bretum því hann var samningslaus og tók ekki áhættuna á því að spila. Ef hann hefði meiðst í landsleikjunum væri hann ekki tryggður og ferillinn var þvi mögulega í hættu hefði hann meiðst.

„Eftir fyrsta leikinn gegn Bretum sem við unnum sannfærandi hér heima þá var þetta mjög raunhæft að við kæmust á lokamót í fyrsta sinn í sögu Íslands. Ég var samningslaus og þurfti því að taka ákvörðun um hvað ég ætlaði að gera," segir Jón Arnór.

„Ég þurfti að ákveða hvort ég ætlaði að sitja á hliðarlínunni sem áhorfandi eða taka þátt í þessu og táka ákveðinn séns. Auðvitað tók ég slaginn. Ég tók mjög góða ákvörðun því þetta blessaðist allt saman. Við komumst inn á lokamót sem hefur alltaf verið draumurinn hjá mér og öllum í landsliðinu. Öll þessi ár sem við höfum spilað með því," segir Jón Arnór.

„Það var rosalega leiðinleg ákvörðun að spila ekki fyrsta leikinn, því auðvitað er þetta mín atvinna. Ég þarf að passa uppá mína heilsu og ég var ekki tryggður hefði ég spilað með landsliðinu. Ég var samningslaus og það var kannski ekki staða sem ég hélt að myndi koma upp. Markaðurinn var eitthvað að stríða mér og ég fékk ekki þessi tilboð sem ég vonaðist til," segir Jón Arnór.

„Ég var það þungur yfir þeirri ákvörðun að vera ekki með þannig að ég tók slaginn með þeim og ég sé alls ekki eftir því í dag."

Maður veit aldrei hvar maður endar

Körfuboltamaðurinn segir að hann sé vonandi búinn að ryðja ákveðinn veg fyrir körfuboltafólk og fleiri körfuboltamenn og konur verða á stalli á næstu árum.

„Við eigum svo mikið af góðum íþróttamönnum sem eru að spila á háu stigi, en ég held að það sé árangurinn okkar í landsliðinu sem hafi gert það að verkum að ég sé að vinna þessi verðlaun núna í ár. Ég þakka mínum liðsfélögum og þeir eiga þetta með mér," segir Jón Arnór.

„Við erum að ná árangri með landsliðinu okkar á rosalega háu "leveli", eins lítil körfuboltaþjóð og þjóð við erum almennt. Sá árangur er það sem er að skila þessum titli í höfn eftir öll þessi ár. Ég er mjög stoltur af því og þetta er mikill heiður," segir Jón Arnór.

„Við höfum átt Eið Smára og þessi goð í fótboltanum, Óli (Ólafur Stefánsson) hefur verið mikilvægur í handboltalandsliðinu og þeir hafa náð mjög góðum árangri. Loksins erum við í körfuboltanum að ná árangri með landsliðinu og ég held að það sé mikilvægasti hlekkurinn í þessu," segir Jón Arnór.

„Íslendingar taka mun betur eftir því og þar af leiðandi skilar það sér niður í hreyfinguna til yngri iðkenda. Þeir hafa þá meira til að horfa upp til og vonandi verðum við fleiri í framtíðinni. Við eigum fullt af flottum ungum og efnilegum leikmönnum sem eru að stíga sín fyrstu skref í háskolaboltanum og atvinnumennsku. Vonandi verðum við fleiri sem komumst á þennan lista svo yngri iðkendur hafi fleiri til að horfa upp til."

Jón hefur komið víðs vegar við á sínum ferli. Hann gekk meðal annars árið 2003 í raðir Dallas Mavericks í NBA-boltanum, en stoppaði stutt við þar og stuttu síðar var hann mættur til Rússlands.

„Ég vissi ekkert hvað ég var að gera þegar ég var að fara til Dallas. Ég var svo ungur að ég man varla eftir því. Ég var ungur og óreyndur og auðvitað hefði maður viljað búa að þessari reynslu sem maður hef í dag þá, ég hefði þá kannski verið lengur."

„Svo allt í einu var ég kominn til Rússlands frá Bandaríkjunum. Maður veit aldrei hvar maður endar, en ég held að þetta hafi bara verið nokkuð skemmtileg ferð. Þessi reynsla að spila í þessum körfubolta og er ég mjög lánssamur að hafa spilað öll þessi ár."

„Ég hef verið á Ítalíu, Spáni og Rússlandi og hef séð heiminn og kynnst mikið af skemmtilegu fólki og menningu. Ég vissi aldrei út í hvað ég var að fara. Ég var bara mættur með bestu leikmönnum í heimi í klefann og æfa með þeim og spila," sagði Jón Arnór og endaði á hjartnæmum orðum:

„Ég hef verið í tólf ár í atvinnumennsku og þetta hefur gefið mér rosalega mikið. Ég er betri manneskja í dag," sagði þessi magnaði íþróttamaður að lokum.