Ofursnekkjan verður hér á landi þar til í ágúst

Haraldur Sigurðsson eldfjallafræðingur verður mikið á ofursnekkjunni Octopus á meðan hún dvelur hér við Reykjavíkurhöfn. Haraldur segist vera tengdur skipinu en ekki geta gefið nákvæmar upplýsingar um hvers vegna skipið er komið til Íslands nú, né hvort Paul Allen, eigandi skipsins og annar stofnandi Microsoft, sé með í för.

„Skipið verður hér af og til þangað til um miðjan ágúst á þessu svæði,“ segir Haraldur. Hann segir þó helstu ástæðu þess að Octopus er komið hingað til lands í sumar vera ferðaáhuga. Markmiðið sé að „skoða Ísland og umhverfið.“

Haraldur hefur starfað mikið með Allen en þeir deila djúpstæðum áhuga á eldstöðvum, sér í lagi hefur Allen áhuga á eldvirkni og jarðhita á hafsbotni. Sú skoðun sem fram mun fara í heimsókninni nú mun ekki þurfa nein sérstök leyfi, ekki standi til að snerta botninn né neitt slíkt.

Octopus „draumur vísindamannsins“

Octopus, eða Kolkrabbinn, er 126 metra löng, eða 50 til 60 metrum lengri en stærstu togarar íslenska flotans enda er hún níunda stærsta ofursnekkja veraldar, sem ekki er í eigu þjóðhöfðingja eða þjóða. Tvær þyrlur eru um borð og tveir litlir kafbátar. „Það er eins og draumur vísindamannsins. Best útbúna hafrannsóknarskip í heimi. Og svo er 56 manna áhöfn fyrir einn mann,“ segir Haraldur. Hann hefur ferðast á því til Nýju-Gíneu og til Salomonseyja með Allen í því skyni að rannsaka jarðhita og hefur með honum skoðað eldfjöll víðsvegar um heiminn bæði að ofan og neðan.

„Svo hefur þetta skip unnið við að kanna Hood sem var stærsta herskip Breta í seinni heimstyrjöldinni. Það var skotið niður á milli Íslands og Grænlands í seinni hluta stríðsins. Skotið niður af þýsku herskipi sem hét Bismarck. Skipið hefur nú verið fundið og Octopus hefur tekið þátt í að kanna það flak sem er á tæplega 3 kílómetra dýpi,“ útskýrir Haraldur. Paul Allen ku einnig vera mikill áhugamaður um fornminjar neðansjávar og skipsflök.

Ofursnekkjan sigldi fyrst hingað til lands árið 2010 og vakti þá mikla athygli. Allen og kærasta hans sem átti þrítugsafmæli flugu þá hingað til lands á einkaþotu og dvöldu um borð í skipinu.

Haraldur fór í leiðangur með Octopus árið 2012 til að sækja skipsbjölluna á breska skipinu Hood og rannsakaði háhitasvæði við Ísland.