Um 50 fyrirtæki vilja selja Rússum matvæli

Alls 51 íslenskt matvælafyrirtæki bíður nú ákvörðunar rússneskra yfirvalda vegna umsókna um innflutningsleyfi til Tollabandalags Rússlands, Hvíta-Rússlands og Kasakstans. Mjólkursamsalan (MS), Fjarðalax, Stjörnugrís og Sláturhúsið á Hellu eru á meðal umsækjenda.

Samkvæmt upplýsingum frá Matvælastofnun höfðu 44 fiskvinnslu- eða fiskeldisfyrirtæki sótt um innflutningsleyfi þegar sendinefnd tollabandalagsins kom hingað til lands um miðjan nóvember til að gera úttekt á fisk-, kjöt- og mjólkurframleiðslu. Tíu starfsmenn Matvælastofnunar Rússlands unnu úttektina, sem tók tvær vikur, en á þeim tíma tókst ekki að heimsækja alla umsækjendur. Matvælastofnun gerir ráð fyrir að umsóknirnar verði afgreiddar á fyrstu mánuðum næsta árs.

Einar Sigurðsson, forstjóri MS, segir fyrirtækið líta á Rússland sem framtíðarmarkað.

„Við erum að kanna aðeins möguleika á skyrútflutningi til Rússlands. Það hefur einnig verið töluverður áhugi þar fyrir fituríkum vörum, ostum og öðru slíku, en vegna söluaukningarinnar á þeim hér heima þá hyggjum við ekki á neinn slíkan útflutning á næstu misserum,“ segir Einar. 

Eins og kom fram í Fréttablaðinu í gær hefur fall rúblunnar leitt til þess að íslenskir fiskútflytjendur ætla að gera hlé á útflutningi sínum til Rússlands. HB Grandi og Iceland Seafood eru þar á meðal en þau eru í hópi 82 íslenskra fyrirtækja sem eru nú þegar með leyfi til útflutnings á sjávarafurðum til Rússlands. 

Einar segir ákvörðun MS um að sækja um leyfi ekki tengjast ákvörðun rússneskra yfirvalda um að setja innflutningsbann á flest ríki Evrópu, Noreg og Bandaríkin. 

„Þetta var komið af stað áður en það gerðist og við fylgjumst með efnahagsástandinu í Rússlandi. Þetta er hins vegar stór framtíðarmarkaður og við viljum vera tilbúin með viðurkenningar fyrir mjólkurstöðvar fyrirtækisins.“

Hörður Harðarson, formaður Svínaræktarfélags Íslands, segir rússneska kaupendur hafa sýnt íslensku svínakjöti aukinn áhuga eftir að innflutningsbannið tók gildi. Því hafi kjötvinnslufyrirtækið Stjörnugrís ákveðið að sækja um innflutningsleyfi. 

„En svo vitum við ekkert hvernig þessu viðskiptabanni reiðir af og ef það fer eitthvað að rofa til í viðskiptum Evrópusambandsins og Rússa þá verður allt önnur staða uppi. En það gæti verið áhugavert að láta á þetta reyna og hvaða möguleikar eru þarna í stöðunni. Ég geri ráð fyrir að leyfið fáist afgreitt í byrjun næsta árs,“ segir Hörður.