Baltasar Kormákur, Sigurbjörn Bárðarson og fleiri kölluðu eftir því í frétt vísis í gær að veðreiðar yrðu teknar upp á Íslandi. Segja má að vefmálasíðan Betsson hafi að einhverju leyti svarað kallinu því áhugamenn íslenska hestsins geta veðjað á hinar ýmsu greinar á Landsmótinu sem sett var á Gaddstaðaflötum við Hellu í gær.
Eins og sjá má á síðu Betsson þykir Árni Björn Pálsson á Stormi frá Herríðarhóli til alls líklegur í töltkeppni laugardagsins. Á sunnudeginum í A-úrslitum í A-flokki þykir Þórarinn Ragnarsson á Spuna frá Vesturkosti líklegastur.
Landsmótsgestir eiga von á ágætu veðri um helgina ef marka má nýjustu veðurspár Veðurstofu Íslands.
