Ungir og aldnir saman í jóga

„Það er eitthvað við það að fara yfir sjóinn og horfa á borgina frá nýju sjónarhorni og stunda saman jóga úti í náttúrunni,“ segir Arnbjörg Kristín Konráðsdóttir jógakennari, sem stendur fyrir Fjölskyldujóga í Viðey í dag milli kl. 13 og 14.30.

Styrktarfélagið Jógahjartað stendur fyrir viðburðinum þar sem á dagskránni eru jógaæfingar, leikir, öndun í sjávarloftinu og hugleiðsla.

„Við slökum á og njótum heilandi tóna gongsins sem er alveg magnað úti í guðsgrænni náttúrunni. Fjölskyldan hefur gott af því að komast burt frá hversdagsleikanum en þetta er náttúrufegurð sem er bara í fimm mínútna siglingarfjarlægð.“

Þetta er í annað sinn sem Fjölskyldujóga fer fram í Viðey og er Arnbjörg spennt fyrir deginum enda veðurspáin fyrir daginn eins og best verður á kosið.

„Það var æðislegur dagur hjá okkur í fyrra enda er yndislegt að vera í eyjunni. Nú verðum við hjá Friðarsúlunni sem mér þykir vel við hæfi,“ segir Arnbjörg sem hvetur alla til að mæta og eiga endurnærandi stund í eyjunni í faðmi fjölskyldunnar. Hún bendir gestum á að taka ferjuna yfir sundið sem fer kl. 12.15.

Jógahjartað er styrktarfélag sem hefur þann tilgang að bjóða aðstoð við kennslu á jóga, hugleiðslu og slökun í grunnskólum. Jógahjartað miðlar einnig þekkingu til grunnskólakennara og foreldra sem vilja vita meira um jóga.

Meðlimir Jógahjartans eru átta mæður og jógakennarar sem hafa áhuga á velferð barna almennt og trúa því að jóga og hugleiðsla gefi ungu fólki betri tengingu við sjálft sig á leið sinni í gegnum menntakerfið. Hægt er að fræðast meira um samtökin á Facebook-síðu Jógahjartans.