Hlaut eftirsóttan Google-styrk

Helga Guðmundsdóttir, meistaranemi í tölvunarfræði við Háskólann í Reykjavík, hefur fyrst Íslendinga hlotið hinn eftirsótta Google-styrk.



Styrkurinn er til minningar um Anitu Borg sem barðist fyrir auknum hlut kvenna í tölvunar- og tæknifræðum og eiga kvenkyns nemendur í þeim greinum kost á að hljóta styrkinn.

Fjörutíu konur frá Evrópu, Afríku og Mið-Austurlöndum hlutu styrk þetta árið og er Helga ein þeirra. Styrkurinn er rúmar milljón krónur og er styrkþegum boðið í heimsókn á skrifstofur Google í Sviss. Mikill fjöldi sækir um styrkinn en leitað er eftir góðum námsárangri og leiðtogahæfileikum.

„Peningurinn er aukaatriði fyrir mér. Mesti heiðurinn er að fá að heimsækja Google núna í júlí og viðurkenningin sem styrkurinn er fyrir það sem maður hefur verið að gera. Google sýnir líka áhuga á að maður sæki um hjá þeim í kjölfarið og vilja halda sambandi við mann,“ segir Helga.

Helga var ein stofnenda /sys/tur, samtaka kvenna í tölvunarfræðinámi í HR, og hafa stjórnendur Google tjáð Helgu áhuga á að styðja við félagsskapinn með einhverjum hætti.

Google birti nýlega kynjahlutföll hjá sér og konur eru eingöngu 30 prósent starfsmanna og eingöngu 17 prósent í tæknistörfum. Styrkurinn er til þess fallinn að hvetja konur áfram, bæði til að fara í námið og sækja um störf.

„Tækifærin eru mörg í þessum geira og þá sérstaklega fyrir konur. Við erum vakandi fyrir þessu og viljum endilega fá fleiri konur í námið,“ segir Helga sem er nýkomin frá Bandaríkjunum. Þar hefur hún verið að vinna í meistararitgerðinni í samstarfi við Cornell-háskóla.

„Ég fann það úti hvað það er mikill heiður að fá þennan styrk, allir þekktu vel til hans og þetta er gífurleg viðurkenning fyrir mig faglega.“