Slysin gera ekki boð á undan sér

Slysin gera ekki boð á undan sér. Því fékk 5 ára sonur Odds Jenssonar að kynnast þegar hann fór upp úr heita potti í flýti í heimahúsi í gærdag og rak lærið í stand á sólhlíf í garðinum.

Níu spor voru saumuð á læri drengsins á slysavarðsstofunni í Keflavík.

,,Fólk þarf að passa hvað er í kringum börnin. Þetta var algjört óhapp," segir Oddur sem samþykkir að segja frá atvikinu og birta myndirnar til að minna fólk á að hafa umhverfið öruggt þar sem börn leika sér.

,,Hann vildi fara upp úr pottinum eftir að eldri bróðirinn fór upp úr en fullorðinn aðili var hjá þeim úti á verönd. Sá sagði honum að hinkra aðeins því hann ætlaði að taka bróður hans fyrst upp úr. En hann flýtti sér of mikið," útskýrir Oddur og bætir við:  ,,Mikilvægt er að fólk sé meðvitað um umhverfið þar sem börnin leika sér."

Hvernig líður drengnum þínum? ,,Hann hefur það gott. Sárið er ekki eins djúpt og það lítur út fyrir að vera á myndinni. Hann fann mest til þegar hann var deyfður áður en sárið var saumað."

,,Það var mjög vel tekið á móti okkur á slysamóttökunni í Keflavík en slysin gera ekki boð á undan sér. Það er bara svoleiðis," segir Oddur glaður að ekki fór verr.