Gylltar hauskúpur í verðlaun

Julia, hefndartryllir í anda neon-noir, sló rækilega í gegn á Screamfest-hryllingskvikmyndahátíðinni, sem haldin var í Los Angeles um miðjan mánuðinn. Af þrettán verðlaunum hreppti Julia fern, þar á meðal fyrir bestu frumsömdu tónlistina, verðlaun sem Frank Hall hampaði, og klippingu Sverris Kristjánssonar.

Verðlaunin voru við hæfi, gyllt hauskúpa, sem þeir félagar eiga von á í pósti innan tíðar. „Bergsteinn Björgúlfsson hefði ekki síður verið vel að hauskúpunni kominn fyrir frábæra kvikmyndatöku,“ segir Frank. Tildrög þess að þremenningarnir tóku þátt í gerð hryllingsmyndarinnar voru að leikstjórinn og handritshöfundurinn, Matthew A. Brown, sá kvikmyndina Svartur á leik og hafði samband við tökumann og tónsmið myndarinnar, þá Bergstein og Frank.

„Við hittumst og töluðum saman rétt fyrir jólin í fyrra. Brown hafði mjög skýra sýn á Juliu og einnig afgerandi hugmyndir um tónlistina. Honum leist vel á fyrstu prufur sem ég sendi honum í janúar og úr varð að ég vann út frá þeim. Við hittum fljótlega á réttan tón, köstuðum boltanum á milli og hann spilaði tónlistina fyrir leikarana. Ég fékk hana svo í hausinn ef honum fannst ég vera kominn út af sporinu,“ segir Frank.

Leikstjórinn kom til landsins í ágúst, klippti myndina með Sverri og Frank lauk við tónsmíðarnar. En hvernig er tónlistin við Juliu? „Dimm og drungaleg,“ svarar Frank og útskýrir nánar: „Stemmningin í myndinni speglast í myrkum götum, börum og neonljósum. Eiginlega subbuleg og groddaleg raftónlist, en hún er líka á himneskum nótum eins og leikstjórinn kallaði eftir í samræmi við umbreytingu söguhetjunnar. Hann sagðist vilja heilagleika.“

Að mati Franks er Julia ekki hreinræktuð hryllingsmynd eins og þær sem alla jafna eru sýndar á hátíðum á borð við Screamfest. Hann er sammála því að hún sé hefndartryllir í anda neon-noir eins og kvikmyndavefurinn IMDb skilgreinir hana. Julia sé jaðarmynd og sannarlega ekki fyrir viðkvæma og börn.

„Mjög flott mynd og aðalleikkonan, Ashley C. Williams, líka mjög góð, enda var hún valin besta leikkonan á hátíðinni,“ segir hann og bætir við að Julia hafi verið tekin til sýninga í um 60 kvikmyndahúsum vestanhafs. „Óvenjulegt þegar jaðarmyndir af þessu tagi eru annars vegar.“