Ágætu VR félagar!

Ágætu VR félagar! Undirritaður hefur ákveðið að bjóða sig fram til stjórnar VR.

Kjaramálin eru mál málanna þessa dagana. Við í VR vorum eitt af þeim félögum sem samþykktum núgildandi samning, svokallaðan aðfarasamning sem gilda á í eitt ár. Þessi aðfarasamningur var gerður vegna þess að ekki þótti liggja nægilega vel fyrir með ýmsar ráðstafanir ríkisstjórnarinnar sem nú standa fyrir dyrum og hvaða áhrif þær muni hafa á samfélagið og einnig reynir á með þessum stutta samningi hvort hægt sé að halda verðhækkunum í skefjum og auka kaupmátt. Tímann á svo að nýta til þess að vinna að lengri samningi sem tæki gildi um næstu áramót.

Það sem af er þessu ári hefur verið fróðlegt að fylgjast með því hvernig sumir fyrirtækjaeigendur hafa brugðist við því að halda verðhækkunum í skefjum og jafnvel lækkað verð á vörum og þjónustu, aðrir hafa þó hækkað. Innflytjendur hafa bent á að erlent innkaupsverð á vörum hafi hækkað um ca. 4-8% frá áramótum en styrking krónunnar hefur komið í veg fyrir að sú hækkun hafi skilað sér út í verðlagið. Nýjustu fréttir herma að verðbólgan síðastliðna 12 mánuði hafi verið 2,1% og ekki mælst jafn lág síðan í janúar árið 2011. Ríkið hækkaði að vísu flestar sínar gjaldskrár um áramótin um 3% en lofaði að sú hækkun yrði dregin til baka ef kjarasamningarnir í desember yrðu samþykktir og hækkunin yrði þá undir verðbólgumarkmiðum Seðlabankans sem eru 2,5%.  Frumvarp þess efnis liggur nú fyrir Alþingi þar sem hækkunin fer úr 3% niður í 2%. Í þessu samhengi þarf svo að skoða sérstaklega með verðtrygginguna og finna ásættlanlega lausn á henni.

Húsnæðismálin eru annar málaflokkur sem ég hef mikinn áhuga á og vil vinna að. Það er ljóst að í dag á ungt fólk mjög erfitt með að koma sér upp þaki yfir höfuðið og þá á ég bæði við fjármögnun á eigin húsnæði og ekki síður að komast í öruggt leiguhúsnæði. Það þarf að stuðla að því að ungu fólki verði gert auðveldara að koma sér upp öruggu húsnæði og þeim standi til boða fjölbreytt búsetumynstur.

Atvinnumálin eru enn í mikilli óvissu og þar þarf VR að koma enn sterkar að og leggja sitt af mörkum til að stuðla að fjölgun atvinnutækifæra. Einnig þarf að efla enn frekar þjónustu við atvinnuleitendur og kynna enn betur fyrir þeim réttindi þeirra og skyldur.

Fleiri mál eru ofarlega í huga mér eins og jafnréttismál og þar tel ég jafnlaunavottun VR mjög mikilvæga. Starfsmenntamál, þar þarf að hlúa betur að og VR þarf að koma að þeim málaflokki með markvissari hætti.

Félagsmálin. VR er fjölmennt og fjölbreytt félag. Það hefur sýnt sig að mjög lítill hópur félaga tekur þátt og er virkur í félagsstarfinu. Það þarf að vinna að því að efla félagsvitund og áhuga félagsmanna á félaginu sínu.

VR er öflugt félag. Ég býð mig fram til þess að vinna að því að gera VR enn öflugra í þágu ykkar félagsmanna. Þess vegna óska ég eftir ykkar stuðningi nú þegar kosið verður til stjórnar VR til næstu tveggja ára. Kosningin hefst 6. mars og stendur til hádegis þann 14. mars.

Verum virk og tökum þátt!