Mikil aðsókn í leiklistarprufurnar

„Ég er nýkominn heim, ég var viðstaddur prufurnar í New York, það mættu um 500 manns í prufur og það var mikið stuð. Þetta var svakalegt ævintýri, erfitt en gaman,“ segir tónlistarmaðurinn Stefán Örn Gunnlaugsson, en hann er tónlistarstjóri og pródúserar jafnframt alla tónlist í íslenska indie/rokk-leikhúsverkinu, Revolution Inside the Elbow of Ragnar Agnarsson Furniture Painter í New York.

Um er að ræða eins konar söngleik eftir Ívar Pál Jónsson og þá sér Bergur Þór Ingólfsson um leikstjórn en ráðgert er að frumsýna verkið í ágústmánuði í New York. Lee Proud er danshöfundur og Petr Hlousek hannar sviðsmynd en þeir ásamt Bergi unnu saman að Mary Poppins á Íslandi.

Um framleiðslu verksins sjá Theater Mogul og Karl Pétur Jónsson.

„Þetta kom þannig til að Ívar Páll Jónsson, sem semur leikritið, lög og texta, hafði samband við Jónas Sig og spurði Jónas hvort hann vildi taka þátt í þessu með honum. Hann hafði dálæti á tónlist Jónasar og í kjölfarið benti Jónas svo á mig og ég kom inn í þetta. Síðan eru liðin þrjú ár og allt að smella saman,“ segir Stefán Örn spurður út í upphafið.

Stefán hefur gert plötu með tónlistinni úr söngleiknum og þar koma fram íslenskir tónlistarmenn. „Það eru söngvarar eins og Eyþór Ingi, Valdimar Guðmundsson, Sigríður Thorlacius, Lára Rúnarsdóttir, Íkorni og Soffía Björg Óðinsdóttir sem syngja lögin á plötunni, ásamt íslenskum hljóðfæraleikurum,“ bætir Stefán Örn við.

Einnig syngur á plötunni Liam McCormick, höfuðpaur hljómsveitarinnar The Family Crest.

Á facebook-síðunni má kynna sér nánar um verkið, þá má einnig fylgjast með á Twitter.