„Endar með ósköpum ef fólk ætlar að taka lögin í eigin hendur“

Viðkvæmum rannsóknargögnum um meint kynferðisbrot lögreglumanns gegn ungri stúlku hefur verið lekið á netið. Málinu var vísað frá á sínum tíma. Gögnum er lekið með samþykki móður stúlkunnar. Alþingismaður hefur áhyggjur af þróun mála.

Gögnin eru mjög ítarleg og eru vel á annað hundrað blaðsíður. Þar eru meðal annars skýrslur af viðtölum sem tekin voru í Barnahúsi af stúlkunni og vinkonum hennar. Móðirin segir í samtali við Vísi í dag að hún og dóttir hennar hafi allsstaðar komið að lokuðum dyrum og væru við það að gefast upp.

Málið var rannsakað á sínum tíma og fór meðal annars inn á borð ríkislögreglustjóra, innanríkisráðherra og þá tók Umboðsmaður Alþingis málið fyrir.

Barnaníðingar mynd- og nafngreindir

Færst hefur í aukana á síðustu árum að dæmdir barnaníðingar séu mynd- og nafngreindir á netsíðum. Í þessu tilfelli eru hins vegar gögn birt í rannsóknargögn í máli sem var vísað frá.

Brynjar Níelsson, alþingismaður og hæstaréttarlögmaður segir þessa þróun hættulega. „Við höfum leikreglur. Lögreglan rannsakar og dómstólar dæma. Við getum auðvitað verið ósátt við þá niðurstöðu og gagnrýnt hana. Það er ekkert við það að athuga. Þegar fólk ætlar hins vegar í reiði sinni að fara sjálf að brjóta lög og reglur - það endar með ósköpum,“ segir Brynjar.

Refsivert athæfi

Þeir sem standa að vefsíðunni gætu átt yfir höfði sér fangelsisvist fyrir að birta gögnin sem að hluta eru trúnaðargögn. Aðstandendur síðunnar vildu ekki tjá sig um málið þegar eftir því var leitað. Viðurlög fyrir að birta trúnaðargögn getur verið margra ára fangelsi.

„Hefðbundið réttarríki eins og við þekkjum - það er verið að vega að því,“ segir Brynjar. „Þetta veldur á endanum upplausn og glundroða. Það sem menn hafa unnið árum og öldum saman er að koma hér á alvöru réttarríki. Það getur farið út um gluggan og er kannski á góðri leið með að gera það.“