Tvær stórstjörnur úr WNBA-deildinni ætla að giftast hvorri annarri

Brittney Griner og Glory Johnson eru í hópi bestu leikmanna WNBA-deildarinnar í körfubolta og það vakti því mikla athygli í Bandaríkjunum þegar þær tilkynntu á samfélagsmiðlum að þær ætli að giftast.

Brittney Griner bað Glory Johnson og setti mynd af því inn á Instagram-síðuna sína þar sem hún sagðist hafa orðið hamingjusamasta persóna í heimi þegar Glory sagði já. Johnson birti síðan mynd af sér á sinni Instagram-síðu þar sem hún lá í rúminu með trúlofunarhringinn á öxlinni.

Þær hafa aðeins verið saman í rúma tvo mánuði en þekkjast vel sem mótherjar bæði í WNBA-deildinni sem og þegar þær léku með Baylor (Brittney Griner) og Tennessee (Glory Johnson) í bandaríska háskólaboltanum.

Brittney Griner er þekktari leikmaður enda sú sem hefur troðið boltanum oftast í sögu kvennakörfuboltans. Griner er 203 sm á hæð og spilar sem miðherji hjá Phoenix Mercury. Hún er með 15,4 stig, 7,9 fráköst og 3,9 varin skot að meðaltali í leik og lið hennar er með besta árangurinn í WNBA-deildinni í ár.

Glory Johnson kom inn í deildina ári á undan Griner og er því á sínu þriðja ári með Tulsa Shock liðinu. Hún er 191 sm framherji og er með 15,0 stig og 9.5 fráköst að meðaltali í leik.

Þær hafa mæst tvisvar sinnum í WNBA-deildinni í ár og Brittney Griner hefur átt stórleik í báðum leikjum. Brittney Griner setti persónulegt stigamet í öðrum leiknum og WNBA-met í hinum með því að verja 11 skot þar af nokkur þeirra frá kærustunni.

Hér fyrir neðan má sjá smá brot af samfélagsmiðlum Brittney Griner og Glory Johnson.