Kirkjugestum á fremsta bekk var brugðið

Þegar Edda Ingibjörg Eggertsdóttir gekk að eiga Valdimar Jóhann Bergsson fyrir fimm árum má segja að dóttir þeirra Petra Björk hafi stolið senunni í kirkjunni.

Eins og sjá má á myndinni hér fyrir neðan sem Harpa Hrund Bjarnadóttir ljósmyndari fangaði á hárrétta augnablikinu í miðri athöfn ákvað litla stúlkan að velta sér á kjól móður sinnar.   Kirkjugestum á fremsta bekk leist skiljanlega ekki á blikuna en brúðhjónin höfðu ekki hugmynd um hvað var í gangi.

„Þetta var 4. júlí árið 2009 í Lágafellskirkju í Mosfellsbæ. Presturinn heitir Sr. Þór Hauksson úr Árbæjarkirkju sem fermdi okkur bæði á sínum tíma," segir Edda þegar við biðjum hana góðfúslega um leyfi til að birta myndina og rifja upp fyrir okkur þetta yndislega augnablik.

Tveggja ára dóttirin stal senunni

„Á meðan presturinn var að blessa okkur þá hefur Petru Björk eitthvað farið að leiðast svo hún fór að velta sér þarna ofaná kjólnum mínum og gera einhverjar æfingar."

Kirkjugestum leist ekki á blikuna

„Mömmum okkar og ömmum sem sátu á fremsta bekk leist ekkert á þetta en vildu þó ekki grípa inn í þar sem það heyrðist ekkert í henni og við tókum ekki einu sinni eftir þessu. Hún hefði getað orðið fúl ef hún hefði verið dregin í burtu og mótmælt eitthvað," segir Edda.

„Þess má til gamans geta að þegar ég tók hringinn til að setja á fingur Valdimars þá hrópaði Petra yfir alla kirkjuna: „Nei mamma, pabbi á þennan hring!". "

„Hún var mjög skondin á þessum aldri," segir Edda kát yfir uppátækjum dóttur sinnar á þessum eftirminnilega degi í lífi þeirra.



Harpahrund.is