Vilja færa höfuðstöðvar Jivaro til Bretlands

Eigendur Jivaro eiga nú í viðræðum við breska fjárfesta sem vilja kaupa um tíu til tuttugu prósenta hlut í íslenska hugbúnaðarfyrirtækinu fyrir um 250 milljónir króna. Samkvæmt heimildum Markaðarins krefjast bresku fjárfestarnir þess að höfuðstöðvar Jivaro verði fluttar til Bretlands en þróunarstarf fyrirtækisins yrði áfram hér á landi.

Jivaro þróar nú samfélagsmiðil og hugbúnað fyrir þá sem spila póker á netinu. Hugbúnaðinum er ætlað að aðstoða notendur við að spila betur og greina andstæðingana, samkvæmt upplýsingum af vefsíðu fyrirtækisins. Samkvæmt ársreikningi Jivaro árið 2012 voru hluthafar fjörutíu talsins.

Félagið Alterego Studios ehf. átti þá stærstan hlut eða tæp 57 prósent.

Stefán Álfsson, framkvæmdastjóri Jivaro, vildi ekki tjá sig um hugsanlega aðkomu bresku fjárfestanna að fyrirtækinu eða hvort til stæði að færa höfuðstöðvarnar úr landi. Hann segir fyrirtækið hafa leitað eftir áhugasömum fjárfestum, bæði hér heima og erlendis, og bendir á vankanta í rekstrarumhverfi nýsköpunarfyrirtækja hér á landi.

„Stuðningur við sprotafyrirtæki hér heima mætti vera meiri, bæði við fyrirtækin sjálf sem og þá sem vilja fjárfesta í þeim. Sérstaklega er það augljóst þegar maður skoðar þetta í öðrum löndum hvort sem það er í Norður-Ameríku, Bretlandi eða annars staðar á Norðurlöndum. Í Bandaríkjunum eru bæði skattaívilnanir fyrir fjárfesta og beinir styrkir fyrir nýsköpunarfyrirtæki. Í Bretlandi geta nýsköpunarfyrirtæki til að mynda gengið að því vísu að fá styrki frá hinu opinbera sem ekki er hægt að fá hér,“ segir Stefán.

Um tuttugu manns starfa að hans sögn hjá fyrirtækinu. Helmingur starfsliðsins vann áður hjá CCP og Stefán segir fyrirtækið búa að mikilli reynslu „þungavigtarmanna“ úr hugbúnaðargeiranum.

„Við reiknum með að næsta ár verði vaxtaárið okkar en á sama tíma fáum við ekki þá styrki sem við sækjum um hér heima og ég tel ástæðuna tengjast því að við störfum með þeim sem spila póker á netinu. Við komum því oft að lokuðum dyrum, sem má yfirleitt rekja til vanþekkingar, en póker er ekki fjárhættuspil heldur viðurkennd hugaríþrótt líkt og skák eða bridds,“ segir Stefán.