Bjórinn

Eins og margt ungt fólk á Íslandi hef ég þurft að fara utan til þess að fá ásættanlega vinnu og er nú staðsettur í Lúxemborg. Hér er hægt að kaupa allar gerðir áfengis út um allt á öllum tímum sólarhrings. Nágrannabúðin mín er með áfengisdeild sem er stærri en flestar Bónusbúðir á Íslandi. Flestar 24 tíma bensínstöðvar selja allt frá bjór til vodka og svo er hægt að panta sér rauðvín með pitsuheimsendingunni sinni.

Einn daginn var ég að vinna seint um kvöldið með samstarfsmönnum mínum þegar við ákváðum að panta okkur pitsur. Þegar ég sá kassa af rauðvínsflöskum koma með sendingunni reyndi ég að útskýra fyrir samstarfsmönnum mínum af hverju það væri skrítið fyrir Íslending að geta pantað heimsendingu af rauðvíni seint um kvöld. „Er áfengi ólöglegt á Íslandi?“ spurðu þau. „Nei, það má kaupa áfengi en bara í ríkisreknum búðum sem loka tímanlega og starfa ekki á sunnudögum. Svo má kaupa áfengi á veitingastöðum og börum en það er ólöglegt að fara út með drykkina.“ Viðbrögð starfsfélaga minna var smá hlátur og nokkur samúðarbros. Svo sagði ein kona: „Ég sá í sjónvarpinu að sumir eskimóar væru óvenjulega veikir fyrir áfengi, þess vegna er það ólöglegt á nokkrum stöðum í Alaska.“ Ég svaraði þessari athugasemd með orðum Jóns Páls Sigmarssonar: „I am not an Eskimo, I am a Viking!“ Að svo komnu máli ákvað ég að ræða þetta ekki frekar.

Þegar ég bjó í Belgíu tók ég einnig eftir því hvað áfengisreglugerðin þar var allt öðru vísi en á Íslandi. Hún var mjög svipuð þeirri í Lúxemborg. Það er t.d. mjög vinsælt að kaupa bjór í bíóum í staðinn fyrir gosdrykki. Úti um allt eru bjórbúðir og vínbúðir sem eru með gríðarlegt úrval af alls konar áfengisdrykkjum og það er minnsta mál að hoppa út í sjoppu til þess að kaupa sér rauðvínsflösku með matnum. En getur einhver haldið því fram að íbúar þessara þjóða séu meiri alkóhólistar en Íslendingar?

Ég hef sjálfur aldrei verið mikið fyrir áfengi. En maður spyr sig af hverju er þetta svona öðru vísi á Íslandi? Til hvers er verið að flækja hlutina fyrir neytendum? Af hverju er ríkið að heimta einkarétt á söluvöru sem gæti auðveldlega verið seld í frjálsum og einkareknum fyrirtækjum? Af hverju þurfum við eyða tíma í þetta á Alþingi og gera vesen úr þessu máli? Er það svona gríðarlega erfitt að leyfa fullorðnu fólki að kaupa bjór út í búð?