Þingmaður sem þvær allar helgar

Þingmaðurinn Katrín Jakobsdóttir ætlar að mæta á kvöldstund hjá Vinstri grænum um helgina og eyða tíma með fjölskyldunni. Hún segir líf þingmannsins breytast mikið þegar þingið er starfandi, þá missir hún stjórn á tíma sínum því hún veit aldrei hvað dagurinn ber í skauti sér.

Hvað gerir þú alltaf um helgar? Ég þvæ hverja einustu helgi. Raunar ver ég megninu af helgum í þvottahúsinu!

Stendur eitthvað sérstakt til um þessa helgi? Það stendur til að mæta á kvöldstund hjá Vinstri grænum í Hamraborg á föstudagskvöld þar sem kynnt verður metnaðarfull vetrardagskrá. Svo mun ég hitta gott fólk á laugardagskvöld, verja tíma með fjölskyldunni minni góðu og svo verð ég að sjálfsögðu í þvottahúsinu!

Hver er óskamorgunmaturinn um helgar? Hann er pönnukökur með sírópi!

Hver er yfirleitt helgarmorgunmaturinn? Ekki pönnukökur með sírópi, svo mikið er víst! En ég borða hafragraut nánast alltaf en fæ mér stundum hrökkbrauð með osti á sunnudögum.

Hvernig er dæmigert helgarkvöld? Ef ég er heima þá sest ég í sófann til að horfa á Barnaby lögreglufulltrúa og sofna svo yfirleitt skömmu eftir fyrsta morðið. En stundum nýti ég nú kvöldin til að hitta góða vini og þá endist ég lengur en með Barnaby.

Sefur þú út um helgar?Yfirleitt ekki enda með þrjú börn sem vakna snemma. Sef samt lengur en á virkum dögum.

Vakir þú fram eftir? Nei, ég lognast yfirleitt út af fyrir miðnætti nema ég sé í þeim mun meira stuði.

Ef þú ert næturhrafn færðu þér eitthvað í gogginn á kvöldin? Það kemur fyrir og algjörlega nauðsynlegt ef ég ætla að vaka. Örsjaldan rifja ég upp unglingsárin og borða pitsu í kringum miðnætti – svona einu sinni á ári!

Ertu með nammidag? Hvaða nammi færðu þér? Alltof margir dagar í mínu lífi eru nammidagar og þá er lakkrís og súkkulaði fyrsta val.

Hvað er í sunnudagskaffinu? Pönnukökur ef tími er til, stundum snúður úr bakaríinu eða bara hrökkbrauð.

Hvað er annars að frétta? Af þvottinum? Allt gott að frétta og alltaf nóg af spennandi viðfangsefnum.