Sá sterkasti spilar golf til góðs

„Ég á ekki golfsett en á þó eina golfkylfu, ég held hún sé sexa en ég þurfti að fara með hana í lengingu,“ segir ofurmennið Hafþór Júlíus Björnsson sem tekur þátt í góðgerðargolfmóti hestamanna sem kallast Rider Cup og fer fram á Húsatóftavelli í Grindavík í dag. Fjöldi þekktra einstaklinga tekur þátt í mótinu og má þar nefna Fjölni Þorgeirsson, Loga Bergmann og Stefán Hilmarsson ásamt mörgum fleirum.

„Ég er ekki mikill golfáhugamaður en þetta er samt ágætis sport. Ég hef núna tvisvar sinnum farið í kennslu til Karenar Sævarsdóttur og það hefur gengið vel. Fyrir mig er þetta bara upp á gamanið,“ segir Hafþór Júlíus um golfáhuga sinn.

Hann er 205 sentímetrar á hæð og 170 kíló og því kannski örlítið stærri og meiri en meðalgolfari, er það einhver fyrirstaða? „Maður er kannski aðeins stífari en meðalgolfari, það er ekki alveg það sama að vera í kraftasporti og golfi. Ég held samt að ég muni standa mig með prýði, þó svo að þetta sport sé alveg lúmskt erfitt, maður verður alveg lúmskt þreyttur,“ segir Hafþór Júlíus.

Golfmótið er eins og fyrr segir til styrktar góðu málefni. „Þetta er dagsmót þar sem fjögurra manna lið keppa hvert við annað. Liðsskipan er þannig að það koma tveir úr þeim fyrirtækjum sem taka þátt, einn frægur og einn landsliðsknapi,“ segir Magnús Benediktsson, einn skipuleggjenda mótsins. Hvert fyrirtæki heitir svo á málefni og ef það vinnur þá fer peningurinn til málefnisins.

Í fyrra sigraði lið Baltasars Kormáks. „Það liggur ekki alveg ljóst fyrir hvort hann keppir í ár en hann stóð sig vel í fyrra,“ bætir Magnús við. Eftir mótið býður Bláa lónið keppendum í lónið og síðan verður verðlaunaafhending og almenn gleði í Eldborgarsalnum í Bláa lóninu um kvöldið, þar sem Guðni Ágústsson og Sigríður Elva Vilhjálmsdóttir sjá um veislustjórn.