Hámarksstuð í karókígleðinni

„Markmiðið er að dreifa karókí-gleðinni,“ segir Ragnheiður Maísól en hún blæs til útikarókís á Menningarnótt ásamt Margréti Erlu Maack. Úti-karókíið verður að erlendri fyrirmynd en þær stöllur sækja innblástur til Mauerparks í Berlín þar sem slíkt karókí á sér stað alla sunnudaga.

„Núverandi karókíið okkar er að New York-fyrirmynd,“ segir Margrét Erla. „First we take Manhattan, then we take Berlin,“ syngja þær síðan og hlæja en stöllurnar hafa vakið mikla athygli fyrir lífleg karókí sem þær hafa haldið undir nafninu Hits&Tits.

„Við ætlum að láta fólk skrá sig fyrirfram á Facebook-síðunni okkar, þannig að þetta endi ekki á að vera bara við að syngja,“ segir Ragnheiður en karókíið mun fara fram á torginu með úti-taflborðinu á Lækjargötu og hvetja þær fólk til þess að grípa með sér kippu af engiferi eða samloku og fá sér sæti að fylgjast með.

„Í Mauerpark er alltaf svo mikil stemning, allir fara að syngja með og fólk rambar eiginlega á þetta,“ segir Margrét Erla og Ragnheiður bætir við að þær verði með ýmsa aukahluti til þess að bæta frammistöðu söngvaranna.

„Í Berlín eru þau með pínulitlar græjur, því það snýst í raun allt um framkomu en ekki sönginn,“ segir Ragnheiður.

„Við Margrét erum alltaf með allskonar aukahluti til að ná hámarksstuði, við mælum líka með að fólk mæti í búningum og síðan verður margfrægu, heimagerðu konfettí-sprengjurnar á sínum stað,“ segir Ragnheiður en í þetta sinn verða sprengjurnar með náttúrulega sniði.

„Mamma er að vinna í blómabúð og hún er að safna laufblöðum og blómum fyrir okkur,“ segir Margrét Erla. „Við viljum ekki sprengja konfétti sem mengar alla Reykjavík.“

Útikarókíið mun eiga sér stað, eins og áður hefur komið fram, á Menningarnótt og hefst gleðin klukkan 16:00 og mun standa til 19:00.