Labbaði úr Þórsmörk þegar farið klikkaði

„Þetta var mikið stuð en ég var bara ekki alveg nógu vel undirbúinn,“ segir Helgi Sæmundur Guðmundsson, liðsmaður hljómsveitarinnar Úlfur Úlfur, sem dreif sig upp á Fimmvörðuháls í blíðskaparveðri á sunnudag.

Ferðalagið varð þó töluvert lengra en áætlað var þegar bílfarið sem Helgi reiknaði með úr Þórsmörk klikkaði. „Félagi minn er að keyra þarna um sem „guide“ en það hafði ekkert orðið úr áætlaðri ferð hjá honum um daginn svo hann kom aldrei inn í Þórsmörk.“

Helgi þurfti því að halda af stað fótgangandi um 25 kílómetra leið að Seljalandsfossi og þaðan upp á þjóðveg þar sem hann húkkaði sér far að bílnum sínum sem beið hans við Skóga. Björgunarsveitinni tókst þó að bjarga honum í eitt sinn á leiðinni.

„Þegar ég var kominn að Krossá voru góð ráð dýr því áin var djúp og nokkuð straumþung. Ég lagði ekki í það að vaða yfir svo ég beið í smá stund og velti því fyrir mér hvað ég ætti að gera. Þá skyndilega kemur björgunarsveitin og skutlar mér yfir. Ansi heppilegt, ég verð nú að segja það.“

Helgi segir að allt í allt hafi ferðalagið því verið einir 47 kílómetrar sem hann gekk á 12 klukkustundum. Hann kveðst hafa tognað örlítið á vinstri fæti í svaðilförinni en er að öðru leyti hress. „Ég er enginn fjallagarpur en þetta var mikið stuð. Það væri gaman að ná að ganga Laugaveginn líka í sumar en þá verð ég eflaust að vera örlítið betur undirbúinn.“

Úlfur Úlfur gaf nýverið út myndband við lagið Tarantúlur en lagið er annað smáskífulag væntanlegrar breiðskífu hljómsveitarinnar.

„Eina vinnan mín í sumar er að leggja lokahönd á plötuna en reyni þess á milli hendi ég mér upp á fjöll. Þá reyni ég nú að hlusta á annað en okkar eigin lög, jafnvel eitthvað eftir Bruce Springsteen, Tom Waits, Fleetwood Mac og Arcade Fire.“