Held þetta sé eina torg landsins með gosbrunni

„Það var 16. júní árið 1864 sem verslunarstaðurinn hér við Lambhúsasund á Skipaskaga fékk löggild verslunarréttindi með konungsbréfi frá Kristjáni níunda Danakonugi og það hafði mikla þýðingu fyrir þróun bæjarins.

Við höldum upp á þetta hundrað og fimmtíu ára afmæli í dag með því að opna nýjan matar-og antikmarkað við Akratorgið sem er orðið alveg glæsilegt eftir gagngerar endurbætur.

Ég held þetta sé eina torg landsins með gosbrunni,“ segir Regína Ásvaldsdóttir, bæjarstjóri Akraness kampakát.

Hún segir einnig hafa verið gefið út verslunarkort með yfirliti yfir allar búðirnar í bænum, þannig að fólk geti þrætt þær, skoðað vöruúrvalið og gert góð kaup á Skaganum.

Akratorgið verður vígt formlega klukkan hálf þrjú í dag en antik- og matarmarkaðurinn verður opnaður klukkan eitt. Hann verður aðallega innan dyra en ef veður leyfir færist hluti hans út að sögn Regínu.

Hún segir matvörur frá Vesturlandi í aðalhlutverki. „Þar verða til dæmis kjötvörur beint frá býli, ópilluð rækja og annað fiskmeti, broddmjólk, skyrkonfekt og ís. Einnig verða ávaxtatré til sölu frá okkar landsþekkta ræktanda, Jóni Guðmundssyni,“ segir hún og bætir við.

„Hér í bænum er innflutningsfyrirtæki með lífrænar vöur, olíur, sósur og fleira og það er með bás á markaðinum og hér á Akranesi búa margar konur af arabískum uppruna og þær munu elda og selja girnilega arabíska rétti.“

En hvað um antikvörurnar? „Já, sumir mundu kannski kalla þetta „retró“ en munir frá 1970 eru auðvitað orðin antik. Hér í bænum eru hjón sem heita Krisbjörg og Björgvin sem hafa verið með antikmarkað í bílskúr sínum einu sinni í mánuði og þau færa hluta hans þarna inn.

Björgvin hefur líka safnað yfir 500 róbótum síðan árið 1950 og á mjög skemmtilegt safn af þeim sem hann opnar sýningu á í dag.“

Árið 1864 bjuggu um 300 manns á Skaganum öllum. Staðurinn fékk lögskipuð verslunarréttindi það ár eftir áratuga baráttu heimamanna og þingmanna þeirra, svo sem Hannesar Stephensen og Arnljóts Ólafssonar.

Þó dróst til 1872 að fastakaupmaður settist að á Akranesi. Hann hét Þorsteinn Guðmundsson og verslaði í umboði Thomsensverslunar í Reykjavík.

Smám saman bættust fleiri í hópinn og fimm fyrstu kaupmennirnir reistu allir verslanir við Lambhúsasund.