Fannst skemmtilegt að detta í sjóinn

Ég heiti Bjarni Þór Lúðvíksson, kallaður Baddi, og er 9 ára – bráðum 10. Ég fer í fimmta bekk í Melaskóla í haust. Ég hef rosalega mikinn áhuga á fótbolta og keppi með eldra ári hjá 6. flokki í KR. Ég er að læra á gítar og æfi golf og er núna að byrja sumaræfingar á mánudögum og þriðjudögum hjá Golfklúbbi Reykjavíkur. Mig langar að fá forgjöf sem fyrst, en við sjáum til hvernig gengur með það í sumar. Svo er ég líka í skátunum. Ég er drekaskáti í Ægisbúum.“



Hvers vegna ákvaðstu að fara á siglinganámskeið?

„Af því að mér fannst það mjög spennandi og margir vinir mínir voru líka að fara. Svo var námskeiðið passlega langt, frá mánudegi til föstudags, og svo var það ekki langt frá þar sem ég á heima.“



Hafðirðu einhvern tíma siglt áður?

„Já, en ég hafði ekki áður siglt á bátum eins og þeim sem voru á námskeiðinu. Ég hef siglt á litla Glófaxa með afa Bedda í Vestmannaeyjum en hann var skipstjóri á Glófaxa VE 300. Svo hef ég oft farið með Herjólfi milli lands og Eyja. Ég hef líka siglt á Úlfljótsvatni og svo fór ég á bát frá Ísafirði til Hornstranda og aftur til Bolungarvíkur frá Látrum í fyrrasumar þegar við fórum í ferð um Vestfirði.“



Hvað lærðuð þið á námskeiðinu?

„Ég lærði að stýra kajak almennilega, vera á hjólabáti og stjórna árabát. Svo lærðum við líka hvað við eigum að gera ef við dettum í sjóinn.“



Hvað var skemmtilegast?

„Eiginlega var allt rosalega skemmtilegt og mjög gaman að læra á mismunandi tegundir báta. Ég held samt að mér hafi fundist seglbátarnir skemmtilegastir.“



En erfiðast?

„Ekki spurning, það var árabáturinn sem var erfiðast að eiga við. Það er mjög erfitt að róa.“



Hefurðu siglt eitthvað síðan þú kláraðir námskeiðið?

„Já, ég sigldi á kajak, hjólabátum og árabátum í Drekaskátaútilegunni sem ég var í um síðustu helgi á Úlfljótsvatni. Svo hef ég auðvitað farið með Herjólfi mörgum sinnum.“



Er ekkert hættulegt að sigla?

„Örugglega er hættulegt að sigla, en ef maður fer varlega og er í björgunarvesti og gerir eins og manni er kennt, þá á allt að vera í lagi. Þetta lærðum við á námskeiðinu.“



Hefurðu dottið í sjóinn þegar þú ert að sigla?

„Já, þegar ég var á kajak á námskeiðinu. Mér fannst reyndar mjög skemmtilegt að detta í sjóinn.“



Ætlarðu að læra meira og halda áfram að sigla sjálfur?

„Það kemur bara í ljós – kannski. Vonandi mun afi minn í Eyjum kenna mér einhvern tíma að sigla.“



Myndirðu mæla með því við aðra krakka að fara á siglinganámskeið?

„Já, ekki spurning. Það var mjög gaman að vera á námskeiðinu og læra það sem okkur var kennt um báta og siglingar.“