Á yfir 40 yfirhafnir

Tískudívan Anna Karen Ellertsdóttir er ritstjóri nýrrar tískusíðu á Spyr.is sem heitir einfaldlega Tískudívan. „Ég verð meðal annars með vikulegan þátt í Spyr Sjónvarpi en upphaflega hugmyndin var sú að vera með kennslumyndbönd þar. Hugmyndin þróaðist út í það að fara heim til þekktra einstaklinga og fá þá til að opna fataskápinn sinn. Í fyrsta þættinum fór ég til Jóhönnu Guðrúnar söngkonu og fékk að forvitnast um hennar fatastíl. Við ætlum að halda því áfram og opna fleiri fataskápa ásamt því að vera með kennslumyndbönd, til dæmis mun ég kenna áhorfendum að sauma einfalda flík og einhverja förðun. Svo verður líka bloggað um allt sem viðkemur tísku inni á Tískudívunni."

Anna Karen hefur haft áhuga á tísku og förðun frá blautu barnsbeini og er með stúdentspróf af listabraut Fjölbrautaskólans í Breiðholti þar sem hún lærði fatahönnun. Auk þess er hún förðunarfræðingur. Rauði þráðurinn í hennar stíl er pönkaralegur en hún hefur gaman af alls kyns tilraunastarfsemi. „Ég fæ aðallega innblástur frá öðru fólki og umhverfinu. Ég get ekki sagt að ég eigi einhverja tískufyrirmynd en mér finnst Kate Moss töff og hönnuðurinn Alexander Wang flottur. Mér finnst flottast þegar fólk hefur persónulegan stíl og finnst það hvernig hver og einn klæðir sig vera ákveðið tjáningarform. Ég er ósammála því að fötin skapi manninn, það er frekar þannig að maðurinn geti nýtt fötin til að tjá sig.“ 

Hún hefur gaman af því að fara á útsölur og róta í fötum og finna eitthvað sem enginn annar vill eiga. „Þetta er spurning um að sjá möguleikana í fötunum. Ég finn til dæmis eitthvað sem er úr flottu efni og breyti því svo eftir mínu höfði. Einnig finnst mér gaman að breyta gömlum fötum sem ég á og gefa þeim nýtt líf. Undanfarið hef ég gert mikið af því þar sem ég er búin að vera í háskóla í nokkur ár og þá er ekki hægt að eyða miklu. Þegar ég á pening aflögu er ég hins vegar fljót að eyða honum í föt.

Fyrir sumarið langar mig að fá mér flotta sandala, léttan sumarkjól og litríka slæðu. Það væri líka gaman að eiga bikini til skiptanna þar sem ég fer mikið í sund. Svo er ég líka hrifin af höttum og það væri gaman að bæta við hattasafnið. Auk þess er ég algjört jakkafrík og á erfitt með að standast fallega yfirhöfn. Ég á yfir fjörutíu jakka og tók einu sinni „jakkaáskorun“ þar sem ég var í nýjum jakka á hverjum degi. Þegar ég var búin að vera í þessu í fimm vikur þá hætti ég af því ég nennti ekki meir,“ segir Anna Karen og hlær.