Tvídtúr í Reykjavík

Tweed Ride Reykjavík fer fram á laugardag. Þá verður hjólað í rólegheitum um höfuðstaðinn í spariklæðnaði bresks hefðarfólks.



„Tilgangurinn er að hittast og njóta þess að hjóla um miðbæ Reykjavíkur í sparifötunum. Það er mjög svo frábrugðið því að hjóla á fjöll eða úti í mó í spandex-gallanum,“ segir Þjóðverjinn Alexander Schepsky, einn af aðstandendum hjólatúrsins Tweed Ride Reykjavík.

„Tweed Run varð til í Lundúnum árið 2009 þegar nokkrir reiðhjólafélagar ákváðu að hjóla um borgina í sínu fínasta pússi. Það vatt fljótt upp á sig og hefur siðurinn náð útbreiðslu um allan heim,“ segir Alexander sem íslenskaði tvídtúrinn í fyrsta sinn sumarið 2012.

Þátttakendur Tweed Ride Reykjavík mæla sér mót við Hallgrímskirkju klukkan 13 á laugardag, íklæddirsígildum, virðulegum fatnaði og drögtum í anda bresks hefðarfólks. Síðan hjóla þeir af stað á klassískum, virðulegum borgarhjólum.

„Þegar við hjólum fylktu liði er það fögur sjón að sjá og gleður augu vegfarenda,“ segir Alexander. „Á Íslandi er yfirleitt litið á hjól sem íþróttatæki, eins og fjallahjól og keppnishjól, en upprunalega var reiðhjólið hugsað sem farartæki til að koma fólki á milli staða. Með Tweed Ride viljum við benda borgarbúum á að hægt sé að hafa yndi af rólegum hjólreiðum og meðtaka umhverfi og mannlíf í slíkum yndistúr því Reykjavík er frábær hjólaborg með endalaust skemmtilegar hjólaleiðir.“

Þægilegur fjölskyldurúntur

Áður en hjólað er frá Hallgrímskirkju býður Dr. Bæk fría hjólaskoðun og Bike Brothers þrífa hjólin. Klukkan 13.30 er hópmyndataka og svo er stigið á pedalana klukkan 13.45.

„Við hjólum saman niður Laugaveg og um miðbæinn, förum í pikknikk á sólpalli Satt á Hótel Natura og endum á Kexi Hosteli í „high tea“ með enskum samlokum og smákökum að breskum sið og reynum að vera svolítið ensk í okkur,“ segir Alexander, fullur tilhlökkunar.

Á Kexi Hosteli verður best klæddi herramaðurinn verðlaunaður af Herrafataverslun Kormáks & Skjaldar, best klædda daman hlýtur verðlaun frá versluninni Geysi og fallegasta hjólið fær verðlaun frá Reiðhjólaversluninni Berlin.

„Stemningin er einstaklega létt og skemmtileg þar sem safnast saman fólk með sameiginlegt áhugamál, sem er að klæðast fínum fötum og nota hjól sem farartæki. Þá fer feimnin af fólki og kjaftar á því hver tuska,“ segir Alexander, hvergi banginn við að hjóla í sumarhita í tvídi, sem er gróft ullarefni.

„Íslenskt sumar verður aldrei svo heitt að manni verði of hlýtt í tvíd-fötunum. Við förum líka hægt yfir og njótum þess að skoða borgarlandslagið, gömul hús og mannlíf á þægilegum rúnti sem hæfir öllum í fjölskyldunni.“ 

Taka skal fram að allar gerðir hjóla eru velkomnar í Tweed Ride Reykjavík 7. júní. Skráning og upplýsingar á tweedridereykjavik.weebly.com og á Facebook.