Sverrir Þór skilar liðum sínum alltaf í lokaúrslitin um titilinn

Sverrir Þór Sverrisson, þjálfari Grindavíkur, heldur áfram að bæta við magnaða hefð sína að fara alltaf með sín lið í lokaúrslitin um Íslandsmeistaratitilinn. Grindavík vann sannfærandi og glæsilegan sigur á Njarðvík í oddaleik undanúrslita Dominos-deildar karla og lið Sverris hafa því spilað til úrslita undanfarin fjögur ár og í öll sex skiptin sem hann hefur þjálfað meistaraflokkslið.

Sverrir Þór gerði Grindavík að Íslandsmeisturum í fyrra og hafði veturinn á undan unnið tvöfalt með kvennalið Njarðvíkur. Njarðvíkurkonur fóru líka í lokaúrslitin árið á undan og Sverrir Þór fór einnig með kvennalið Keflavík í úrslitaeinvígið bæði tímabilin sem hann þjálfaði liðið frá 2004 til 2006.

Grindavíkurliðið hefur ennfremur komist í bikarúrslitaleikinn bæði árin hans í Grindavík og vann bikarinn fyrr í vetur. Sverrir Þór er því búinn að vera með lið sín í bæði úrslitum Íslandsmótsins og úrslitum bikarkeppninnar undanfarin þrjú tímabil.

Sverrir Þór var einnig í lokaúrslitunum sem leikmaður Keflavíkur vorið 2010 og þetta er því fimmta tímabilið í röð þar sem hann tekur þátt í lokaúrslitum í annaðhvort karla- eða kvennaflokki. Í raun hefur Sverrir Þór aðeins misst af því að vera í lokaúrslitum þrisvar sinnum á síðustu þrettán tímabilum en það var árin 2007 til 2009.

Frá og með tímabilinu 2001-2002 hefur Sverrir Þór tekið þátt í ellefu lokaúrslitum sem annaðhvort leikmaður (5 sinnum) eða þjálfari (6 sinnum).