Það hellirignir hjá Birni Braga

„Eins og Kaninn segir: Þegar það rignir, þá hellirignir,“ segir Björn Bragi Arnarsson fjölmiðlamaður sem hefur í nógu að snúast þessa dagana.

Hann mun, ásamt félögum sínum í grínhópnum Mið-Íslandi, frumsýna uppistand í Þjóðleikhúskjallaranum í kvöld. Auk þess stýrir Björn Bragi EM-stofunni, sem fjallar um Evrópumótið í handknattleik og verður spyrill í Gettu betur sem hefst á Rás 2 um helgina.

Sem sagt, nóg að gera hjá Birni. „Maður þarf að vera skipulagður og stýra tíma sínum vel. Það er svolítið síðan ég tók þessi verkefni að mér og hef því haft tíma til að undirbúa mig. Mér finnst gott að hafa nóg að gera,“ útskýrir Björn Bragi. Verkefnin eru öll ólík í eðli sínu. „Í EM-stofunni erum við að kryfja leiki, spá í spilin og þess háttar. Að vera spyrill í Gettu betur er vandasamt verk, maður þarf að geta slegið á létta strengi með áhorfendum en samt standa sig gagnvart keppendum og reyna að létta á þeim stressið. Uppistandið er svo auðvitað allt öðru vísi,“ útskýrir Björn.

Sýning Mið-Íslands í fyrra sló í gegn en nú fara þeir félagarnir af stað með glænýtt uppistand. „Við fengum yfir tíu þúsund gesti í Þjóðleikhúskjallarann í fyrra. Nú snúum við aftur með nýtt efni sem hefur aldrei heyrst áður.“ Strax er uppselt á sýngarnar sem hópurinn heldur um helgina. „Viðtökurnar hafa verið frábærar. Sýningin í fyrra gekk vonum framar og þessi sýning fer vel af stað,“ segir Björn.