I am Iceland húðvörurnar næra og hreinsa húðina

„Þetta er hugmynd sem ég er búin að ganga með í maganum í fjölmörg ár og ég fékk mikla hvatningu til að gera eitthvað sjálf. Mig langaði að finna vöru sem hentar flestöllum því það er nóg að gera á kremmarkaðnum,“ segir Anna María Jónsdóttir snyrtifræðingur, sem rekur fyrirtækið I am Iceland ásamt Ragnheiði Guðfinnu og Ólafi Sólimann og framleiða nýjar íslenskar húðvörur.

Anna María er með tuttugu ára reynslu að baki í bransanum og segist hafa prófað fjölmargar vörur á sjálfri sér í leit að hinni fullkomnu vöru. Fljótlega stóð arganolían upp úr með ótrúlegri virkni, sérstaklega í ljósi parabenumræðunnar. Arganolían er handgerð úr kjarna hnetunnar sem vex á argantrénu. Olíuna má nota í hár og alls staðar á líkamann en hún er að mati margra talin vera stjarnan í húðumhirðu.

„Ég sóttist eftir íslensku hráefni í bland við aðrar gæðavörur en ég er búin að vera að búa til mín eigin saltskrúbb lengi. Saltið okkar er svo steinefnaríkt sem hefur jákvæð áhrif á húðina útvortis til að fjarlægja allar dauðar húðfrumur. Steinefnin næra húðina og í leiðinni mettum við húðina svo að arganolían eigi greiðan aðgang.“  

Nýja vörulínan býður einnig upp á moringaduft, sem eru mulin lauf sérpökkuð á Íslandi. Moringatréð hefur verið kallað kraftaverkatré en laufin innihalda háa stuðla amínósýra, B-vítamín og andoxunarefni.

„Moringaduftið er vatnslosandi, hreinsandi og orkugefandi. Það kemur líkamanum fljótt í jafnvægi eftir hátíðirnar, hreinsar ýmislegt óæskilegt úr meltingarvegi og gerir mann kláran í nýtt heilsusamlegt ár 2014.“

Vörurnar fást í Hagkaupi, Lyfjum og heilsu og í netversluninni iamiceland.com