Festist vegna fálkaorðunnar

„Það er mjög mikill heiður að fá svona viðurkenningu en það hefði kannski verið best að fá orðuna bara senda í pósti,“ segir Soffía Vagnsdóttir, skólastjóri grunnskólans í Bolungarvík, létt í lundu en hún fékk á dögunum afhenta Hina íslensku fálkaorðu fyrir störf sín í þágu samfélagsins.

Hún ferðaðist til höfuðborgarinnar eina daginn sem fært var frá Bolungarvík til Reykjavíkur á milli jóla og nýárs til að vera viðstödd afhendinguna. „Við vorum nú aðeins lengur í höfuðborginni en við gerðum ráð fyrir sökum færðarinnar.“

Soffía hafði í hyggju að fara heim strax eftir áramót en komst ekki heim fyrr en á sunnudaginn síðastliðinn.

„Við vorum í þrettán klukkutíma á leiðinni frá Reykjavík til Bolungarvíkur og það er alveg ótrúlegt hvað munurinn er mikill á veðrinu á milli landshluta,“ útskýrir Soffía. Hún bætir við að hún hafi verið með góða músík í bílnum. „Bjöggi Halldórs, Egill Ólafs, Þór Breiðfjörð og Friðrik Ómar björguðu ferðalaginu.“

Fyrir skömmu kom út bókin Trommur og töfrateppi sem geymir frumsamið efni eftir Soffíu. Bókin inniheldur sönglög, þulur, sögur, geisladiska og ýmislegt fleira.