Uppblásanlegur barnabílstóll frá Volvo

Fyrir 50 árum kynnti Volvo fyrsta barnabílstólinn sem sneri aftur og tryggði öryggi barna í bílum mun betur en áður þekktist. Nú hefur Volvo hannað uppblásanlegan barnabílstól sem pakka má saman í bakpoka. Stóllinn er afar léttur og vegur aðeins 5 kíló.

Volvo telur að þeir barnabílstólar sem nú bjóðast séu alltof fyrirferðamiklir, þungir og erfiðir í flutningi og notkun. Engu er fórnað varðandi öryggi barna í þessum nýja stól Volvo, nema síður sé. Stólinn má blása upp á 40 sekúndum og hann er gerður úr afar sterku efni sem þolir háan þrýsting þess lofts sem í honum er uppblásnum.

Aðal kosturinn við þennan barnabílstól er hversu meðfærilegur hann er og auðvelt að flytja með sér, til dæmis meðferðis í leigubíla eða aðra bíla en heimilisins, en títt sé að foreldrar noti ekki barnabílstóla fyrir börn sín nema í eigin bílum vegna þess hve ómeðfærilegir og þungir flestir stólarnir eru. Ekki er komið að fjöldaframleiðslu þessa stóls, enda tilraunaframleiðsla.