Óðni Jónssyni fréttastjóra RÚV sagt upp störfum

Í tilkynningu frá Magnúsi Geir Þórðarsyni kemur fram að öllum framkvæmdastjórum RÚV verði sagt upp og stöður þeirra auglýstar lausar til umsóknar. Þeir sem fá uppsagnarbréfið eru þeir Bjarni Guðmundsson, framkvæmdastjóri sjónvarps, Bjarni Kristjánsson fjármálastjóri, Eyjólfur Valdimarsson tæknistjóri, Óðinn Jónsson fréttastjóri, Skarphéðinn Guðmundsson dagskrárstjóri RÚV, Magnús R. Einarsson dagskrárstjóri útvarps, Þorsteinn Þorsteinsson markaðsstjóri, Berglind G. Bergþórsdóttir mannauðsstjóri og Ingólfur Bjarni Sigfússon nýmiðla- og vefstjóri. Hvað Bjarna Guðmundsson varðar þá hafði hann þegar lagt inn uppsagnabréf þegar hann sótti um stöðu útvarpsstjóra.

Á starfsmannafundi, þar sem þessi ákvörðun var kynnt, var sú spurning borin upp hvort með þessu væri verið að losa sig við fréttastjórann, Óðinn Jónsson? Slíkar bollaleggingar hafa verið uppi, meðal annars í tengslum við meinta slagsíðu sem stjórnarliðar á borð við Vigdísi Hauksdóttur formann fjárlaganefndar hafa haldið fram að sé á Ríkisútvarpinu, að það sé hallt undir aðild að Evrópusambandinu. Magnús svaraði því neitandi með þeim orðum að hann stundaði ekki slík vinnubrögð. Hins vegar liggur fyrir að yfirlýst stefna útvarpsstjóra er að jafna hlut kynjanna en framkvæmdastjórarnir eru að mestu leyti karlmenn.

Þá hvatti Magnús Geir alla framkvæmdastjórana til að sækja um aftur. Nýtt lið framkvæmdastjóra mun taka til starfa um miðjan apríl. Þeir sem fyrir eru munu starfa þar til þá.

UPPFÆRT 12:00

Heimir Már Pétursson fréttamaður náði tali af Magnúsi Geir eftir fundinn og hann spurði útvarpsstjóra hreint út hvort hann væri að losa sig við Óðinn til að þóknast stjórnarherrunum? „Nei, þvert á móti. Ég tók að mér þetta starf sem útvarpsstjóri Ríkisútvarpsins vegna þess að ég sé mikil tækifæri, mikla möguleika fyrir Ríkisútvarpið til framtíðar. Það er mitt hlutverk að koma ferskur að starfsseminni, horfa á starfsemina heildstætt, breyta því sem þarf að breyta og stokka upp,“ segir Magnús Geir.