Óprúttinn aðili þóttist vera Halla á Facebook

Leikkonan, söngkonan og fyrirsætan Halla Vilhjálmsdóttir er ekki par sátt við manneskju að nafni Georgia Grasslington á Facebook.

Georgia sigldi undir fölsku flaggi á samfélagsmiðlinum og notaði myndir af Höllu á síðunni, líkt og að um eigin síðu Höllu væri að ræða.

Samkvæmt Facebook-síðu Georgiu býr hún í Pennsylvaniu í Bandaríkjunum og vinnur hjá Urban Outfitters. Þá þykist Georgia einnig vera Halla á YouTube.

„Guð minn góður. Svo ógnvekjandi. Þetta er óraunverulegt,“ segir Halla.

Hún er búin að tilkynna Georgiu til forsvarsmanna Facebook og var aðgangi huldumanneskjunnar lokað hið snarasta.