Jón Arnór og félagar einir í öðru sæti eftir óvænt tap Barcelona

Jón Arnór Stefánsson og félgar í Unicaja Málaga unnu tíu stiga útisigur á UCAM Murcia, 96-86, í tíundu umferð spænsku úrvalsdeildarinnar í körfubolta í kvöld.

Jón Arnór spilaði tæpar þrettán mínútur í leiknum og skoraði fjögur stig og gaf eina stoðsendingu. Hann hitti úr báðum skotum sínum úr teignum en brenndi af einu þriggja stiga skoti.

Málaga-liðið byrjar leiktíðina frábærlega, en það er í öðru sæti með níu sigra og eitt tap líkt og stórlið Real Madrid, en þau verma efstu tvö sæti deildarinnar.

Barcelona tapaði afar óvænt öðru leik sínum á tímabilinu gegn Sevilla í kvöld, en Sevilla-liðið er við botn deildarinnar.

Börsungar eru því í þriðja sætinu, einum sigri á eftir Málaga og Real Madrid.