Engin lausn í sjónmáli

Engin lausn er í sjónmáli í kjaradeilu lækna en viðræður standa enn yfir í Karphúsinu. Formaður samninganefndar Læknafélags Íslands er svartsýnn á að samningar náist fyrir áramótin.

Samkvæmt heimildum fréttastofu hafa læknar hafnað tilboði um rúmlega tuttugu prósenta launahækkun.

„Við eigum ekki eftir að ná saman í dag,“ segir Sigurveig Pétursdóttir, formaður samninganefndar Læknafélags, í samtali við fréttastofu 365.

„Það ber ennþá talsvert á milli og það er vandamálið. Auðvitað hefur ríkið hækkað sitt tilboð en þetta er ekki nægjanlegt til þess að við getum haldið fólki á Íslandi.“

„Við höfum teygt okkur langt og ég segi það bara fullum fetum að það sem að boðið hefur verið af ríkisins hálfu ber skýr merki þess að það hefur verið hlustað eftir því að það þurfi að kalla heim lækna sem að eru erlendis, að við þurfum að gera breytingar á kjörum lækna með það að markmiði að jafna stöðu þeirra miðað við launaþróun annarra og þar frameftir götunum, en kröfur lækna eins og þær birtust síðast í gær eru algerlega óraunhæfar,“ segir Bjarni.

Þá skoraði Bjarni Benediktsson fjármála- og efnahagsráðherra á lækna í dag að birta kröfur sínar. 

Fjármálaráðherra sakar lækna um að ætla að taka heilbrigðiskerfið í gíslingu með umfangsmiklum verkfallsaðgerðum sínum. Hann vill engu svara um það hvort að til greina komi að setja lög á aðgerðir lækna. 

„Það er engum blöðum um það að fletta að ef að hætt verður við allar stórar aðgerðir frá og með fyrstu vikunni á næsta ári að þá er komið upp ástand sem er algerlega óþolandi og óboðlegt í íslensku heilbrigðiskerfi.“

Bjarni vill ekkert gefa upp um hverjar kröfur lækna séu á þessum tímapunkti í kjaraviðræðunum en hann hefur áður sagt í fjölmiðlum að læknar vilji fá að laun sín hækki um tugi prósenta.

Heilbrigðisráðherra vill engu svara um hvort að til greina komi að setja lög á verkfall lækna. 

„Ég treysti því og vil treysta því og trúa á það að menn nái saman ef að það ekki gengur þá er bara komin upp sú staða og við skulum taka á henni ef til hennar kemur,“ segir Kristján Þór Júlíusson, heilbrigðisráðherra.