Edda Björgvins: „Húmor er ótrúlega öflugt tæki“

Small Business Branding dagurinn verður haldinn í fyrsta skiptið á Íslandi laugardaginn 6. september í Bláa Lóninu. Um er að ræða viðburð sem er tileinkaður eigendum og stjórnendum lítilla fyrirtækja á Íslandi sem vilja ná forskoti á samkeppni og fá örlítið „spark-í-rass" þar sem þeir kynna sér og læra átta áhrifaríkar leiðir til árangurs eins og segir í tilkynningu. Edda Björgvins leikkona sér um veislustjórn.

„Á þessari ráðstefnu verð ég „Master of Ceremony" eða nokkurskonar veislustjóri. Ég kynni fyrirlesarana og í leiðinni kynni ég það sem ég er að fara að markaðssetja úti í heimi undir yfirskriftinni „The Humor Communication Tool" eða hvernig maður notar húmor þegar dauðans alvara blasir við," svarar Edda spurð um hennar hlutverk á þessum degi.

„Samskiptatækið húmor er ótrúlega öflugt tæki en meistararitgerðin mín í menningarstjórnun fjallaði einmitt um húmor sem stjórntæki. Ég ráðlegg öllum sem eru með lítil eða stór fyrirtæki að koma og hlusta á þessa frábæru fyrirlesara - einnig alla þá sem vilja koma sér á framfæri úti í heimi," segir leikkonan sem heldur úti flottri vefsíðu sem sjá má hér.

Meðal fyrirlesara má nefna Dr. Andrea Pennington en hún var á sínum tíma reglulegur gestur hjá Opruh Winfrey og var sjálf með sjónvarpsþátt í Bandaríkjunum sem bar yfirskriftina: The America Empowerment Doctor. Hún umbreytti sínum ferli á sínum tíma, fór út úr því að vera þekktur sjónvarpslæknir yfir í að hjálpa fyrirtækjum að nota fjölmiðla til að koma sér og vörunni sinni á framfæri. Í dag er Andrea með sitt eigið framleiðslu og PR fyrirtæki í Monaco þar sem hún býr.

Átta fyrirlesarar deila reynslu sinni í Bláa Lóninu næsta laugardag eins og sjá má hér.

Hér má nálgast tímarit um ráðstefnuna.