Húsasmiðjan undirritar sátt við Samkeppniseftirlitið

Fyrrverandi eigendur Húsasmiðjunnar hafa undirritað sátt við Samkeppniseftirlitið hvað varðar rannsókn á meintu samráði á árunum 2008 til 2011. Þetta er í fyrsta sinn sem Samkeppniseftirlitið kærir brot til lögreglu á fyrstu stigum eigin rannsóknar en ákæra sérstaks saksóknara á hendur ákveðnum starfsmönnum sem voru við störf á þessu tímabili er sjálfstætt mál sem mun eiga sinn farveg í dómskerfinu.

„Húsasmiðjan ehf., sem fer með reksturinn í dag, hefur samhliða gert samkomulag um að formfesta frekar samkeppnisfræðslu starfsfólks og innleiða formlega samkeppnisréttaráætlun ásamt því að undirgangast frekari skilyrði vegna eignarhlutar Húsasmiðjunnar í Steinull ehf.,“ segir í tilkynningu frá Húsasmiðjunni.

Þrettán fyrrverandi starfsmenn Byko, Húsasmiðjunnar og Úlfsins voru í byrjun maí ákærðir fyrir samkeppnislagabrot vegna verðsamráðs á árunum 2010 til 2011. Í ákærunni er tuttugu og eitt tilvik tilgreind þar sem starfsmennirnir skiptust á upplýsingum um verð á tilteknum vörutegundum.

Brotin áttu sér stað á tímabilinu 13. september 2010 til 3. mars 2011 með skipulagðri upplýsingagjöf um verð og tilboðskjör sérgreindra grófvörutegunda, einkum bygginga- og timburvara, í símtölum milli starfsmanna fyrirtækjanna sem var til þess fallin að hafa áhrif á verð, afslætti, álagningu og önnur viðskiptakjör innan umræddra fyrirtækja.

Árni Stefánsson, forstjóri Húsasmiðjunnar, segir það fagnaðarefni að máli þessu sé formlega lokið.

„Þrátt fyrir að rekstrarfélag Húsasmiðjunnar í dag hafi ekki verið með starfsemi á þeim tíma sem var til rannsóknar fylgir ávallt ákveðin óvissa slíkum rannsóknum og það er hagur Húsasmiðjunnar að fyrri eigendur hafi náð sáttum við Samkeppniseftirlitið án lengri málaferla eða aðkomu dómstóla. Húsasmiðjan lítur fram á veginn og kraftur okkar mun fara í að þjóna viðskiptavinum okkar til framtíðar,“ segir Árni