Vinaliðar gera frímínútur skemmtilegri

Hólabrekkuskóli tók upp svokallað vinaliðaverkefni síðastliðið vor. Verkefnið gengur út á að hvetja nemendur til meiri þátttöku í leikjum og afþreyingu í frímínútum og skapa betri skólaanda. Þannig sjá vel valdir nemendur í 4. til 7. bekk skólans um leiki sem eiga að höfða til allra krakka á fyrstu skólastigum.

Ragnheiður Sveinbjörnsdóttir, kennari við Hólabrekkuskóla og umsjónarmaður verkefnisins, segir verkefnið í raun þríþætt. „Fyrir utan að auka afþreyingarmöguleika verður þetta til þess að minni tími er fyrir stríðni og leiðindi í frímínútum auk þess sem krakkarnir fá meiri hreyfingu.“

Vinaliðaverkefnið er norskt að uppruna og hefur verið framkvæmt í mörg hundruð grunnskólum þar í landi. Árskóli á Sauðárkróki var fyrsti skólinn á Íslandi til að taka það upp en Hólabrekkuskóli var fyrsti skólinn á höfuðborgarsvæðinu sem tók þátt.

„Nokkrir kennarar skólans heyrðu af þessu verkefni á námskeiði. Þeim leist svo vel á að þeir fengu kennara úr Árskóla til að halda fyrirlestur fyrir kennara Hólabrekkuskóla. Við sáum strax að þetta myndi henta hér og ég var svo heppin að fá að stýra þessu verkefni,“ segir Ragnheiður en í framhaldinu voru tveir kennarar frá Sauðárkróki fengnir til að halda leikjanámskeið fyrir vinaliða skólans. „Vinaliðar eru valdir af bekkjarfélögum sínum, fjórir úr hverjum bekk. Börnunum var gerð mjög góð grein fyrir því að þetta væri ekki vinsældakosning heldur átti að kjósa einhvern sem þau treystu til að vera góður við alla, því annars væri ekki hægt að vera vinaliði,“ lýsir Ragnheiður og segir kosninguna hafa komið mjög vel út. Á síðustu önn voru vinaliðar 36 en í ár munu 40 vinaliðar skipta með sér verkefnum. Hópnum er skipt í tvennt og hver hópur sér um tvær frímínútur í viku en vinaliðar aðstoða í frímínútum fjórum sinnum í viku.

Ragnheiður segir verkefnið hafa reynst mjög vel. „Okkur finnst miklu minni vandamál skapast í frímínútum. Þá er krakkarnir mun glaðari og fljótari út í frímínútur,“ segir hún. Verkefnið er nú fyrir krakka í 1. til 7. bekk en Ragnheiður segir stefnt að því að útfæra það fyrir unglingadeildina líka.

Vinaliðaverkefnið hefur lagst vel í allt skólasamfélagið. „Foreldrafélagið styrkti okkur til dæmis vel með alls kyns dóti sem gerir starfið miklu auðveldara,“ segir hún og bendir á að aðrir skólar hafi sýnt þessu mikinn áhuga.