Ætlar ekki að biðja neytendur afsökunar strax

„Mjólkursamsalan á allt undir velvild og tryggð og trúnaði við neytendur. Ef fyrirtækinu verður á í messunni þá vitaskuld biðst það afsökunar. Við teljum hins vegar að Samkeppnisefitrlitið hafi í þessu máli farið villu vegar,“ segir Einar Sigurðsson forstjóri MS.

Rætt var við Einar í beinni útsendingu í fréttum Stöðvar 2. Hægt er að horfa á viðtalið með því að smella á myndskeið með frétt eða hér.

Samkeppniseftirlitið sektaði MS um 370 milljónir króna sl. mánudag fyrir misnotkun á markaðsráðandi stöðu samkvæmt 11. gr. samkeppnislaga með því að veikja keppinauta sína, Mjólku ehf. og Mjólkurbúið Kú ehf. með því að selja þeim hrámjólk á 17 prósent hærra verði en MS seldi tengdum fyrirtækjum, eins og Kaupfélagi Skagfirðinga (KS). Var þessi mismunun í hráefnisverði til þess fallin að veikja Mjólku sem keppinaut MS og tengdra félaga og stuðla að sölu félagsins til KS.

Eftir að Mjólka komst í eigu KS fékk félagið hrámjólk á allt öðru og lægra verði en áður frá MS, en þegar félagið var keppinautur MS og KS á mjólkurvörumarkaði. Í ákvörðun Samkeppniseftirlitsins segir: „(T)elur Samkeppniseftirlitið að MS hafi ekki sett fram nein rök sem geti réttlætt þessa mismunun í verði.“

Brot gegn 11. gr. samkeppnislaga á sér stað óháð því hvort um er að kenna gáleysi eða ásetning hins brotlega fyrirtækis. Samkeppnislagabrot af þessu tagi bitna fyrst og fremst á neytendum og eru því eiginleg lögbrot gegn almenningi.

Einar Sigurðsson segir að MS muni ekki velta kostnaðinum af samkeppnislagabrotunum út í verðlag. Fyrirtækið muni meta hvernig eigi að bregðast við þegar niðurstaða áfrýjunarnefndar samkeppnismála liggur fyrir en MS hefur þegar vísað ákvörðun Samkeppniseftirlitsins þangað.

„Við höfum ekki litið til þess að þetta verði niðurstaðan. Við gerum ráð fyrir því vegna þess hvernig við teljum málið vaxið, að niðurstaðan verði allt önnur í áfrýjuninni,“ segir Einar.