Ætla að endurvekja Galtalækjarstuðið

„Það kom þessi hugmynd frá Galtalækjarskógi, að endurvekja þessa gömlu, góðu stemningu sem var í Galtalæk í denn,“ segir Heiðar Örn Kristjánsson Pollapönkari en pollarnir koma fram á fjölskylduhátíð í Galtalæk um helgina.

„Þetta er frábær staður til þess að halda svona hátíð,“ segir Heiðar en á föstudagskvöldinu munu tónlistarmennirnir og glaumgosarnir Friðrik Dór og Eyþór Ingi koma fram ásamt Pollapönki og halda uppi stuðinu.

„Síðan er dúndrandi dagskrá allan laugardaginn,“ segir Heiðar en meðal dagskrárliða yfir daginn eru til dæmis Sirkus Íslands, andlitsmálarar, Skátaland, Hoppukastali, þrautabraut, Ávaxtakarfan, Veltibíllinn og síðan verður Jón Arnór töframaður með töfrasýningu.

Pollapönk mun síðan stýra kvöldvöku um kvöldið ásamt Ingó Veðurguði.

Það hefur verið nóg að gera hjá strákunum í Pollapönki í sumar en Heiðar segir það ekki hafa verið neitt nema skemmtilegt. „Það liggur við að það sé hver einasta helgi bókuð í sumar,“ segir hann. „Þannig að pollarnir eru á þeytingi um allt land í allt sumar.“

Aðspurður hvort þeir verði ekki þreyttir á öllum hamaganginum þá segir Heiðar það alls ekki vera. „Við komum náttúrulega allir úr rokkhljómsveitum þar sem maður þarf að vaka svo lengi til þess að spila,“ segir tónlistarmaðurinn.

„Núna eru tónleikarnir á skikkanlegum tíma sem er öllu þægilegra.“