"Okkur var sópað inn á lögreglustöðina þar sem sumar fengu sjokk“

„Valkyrjur eru bifhjólakonur sem vita ekkert jafn skemmtilegt og að finna vindinn strjúka mjúkt um vanga sitjandi á mótorfák á ferð í góðra vina hópi. Valkyrjur eru sjálfstæðar og óháðar klúbbum, félagasamtökum og reglum þeirra. Konur sem koma úr öllum stéttum þjóðfélagsins. Hér er engin skuldbundin neinu, hvorki félagsgjöldum, fundarhöldum eða þess háttar,“ segir Sigrún Kaya Eyfjorð Valkyrja sem gaf okkur leyfi til að birta myndirnar sem skoða má hér af Valkyrjunum.

Spurð um meðfylgjandi myndir segir Kaya: „Á myndunum erum við í ferð sem byrjaði á veitingastaðnum Satt á Hótel Natura þar tekið var á móti okkur með yndislegum morgunmat. Þaðan lá leiðin austur fyrir fjall í miklum hita og glampandi sól.

Þar, flestum að óvörum, var uppákoma þar sem lögreglan á Selfossi tók á móti okkur og vísaði hópnum inn á lögreglustöðina þar sem sumar fengu sjokk því þær héldu að þær hefðu gert eitthvað af sér en þetta var vinaleg heimsókn þar sem okkur var boðið í kaffi og meðlæti á lögreglustöðinni í boði Guðnabakarí á Selfossi.

Þar fengum við svo kynningu á greiningarstöð umferðarslysa sem var mjög fróðlegt og snerti við okkur verulega og er góð áminning um að fara að öllu með gát og sýna ýtrasta öryggi í umferðinni.“

„Leiðin lá þaðan í Sólheima Grímsnesi, þar sem við borðuðum kjötsúpu á Geysi og heimsóttum svo sveitabæ sem nefnist Efri Dalur II þar sem við fengum heimagerðan ís. Þar var verulega gott að kæla sig niður eftir fjöruga ferð í frábæru veðri,“ segir Sigrún Kaya.

Næsta ferð Valkyrjanna verður farin laugardaginn 26. júlí að sögn Sigrúnar Kayu.

Hjólavinir og Valkyrjur á Facebook.