Mosi í munstur

Ég tók þátt í sýningu Handverks og hönnunar í Ráðhúsinu síðastliðið haust og eftir hana setti ég Golu á laggirnar. Nafnið Gola tengist textíl í mínum huga, líkt og þegar þvotturinn bærist í golunni. Henni fylgir líka notaleg tilfinning um milt sumar,“ útskýrir Margrét Oddný Leópoldsdóttir textílhönnuður, en hún hannar símunstur sem prentuð eru á löbera og á pappír.

Margrét hafði lengi ætlað sér að vinna munstur og prenta á tau en hugnaðist ekki að leita út fyrir landsteinana eftir prentþjónustu. Þegar slík þjónusta bauðst á Íslandi í haust átti hún safn af munstrum sem hún dreif í prentun.

„Ég hafði notað sumarið til að búa til munstur upp úr náttúrunni í heimahögunum, Grábrókarhrauni í Norðurárdal, og þegar Textílprentun Íslands var opnuð fór ég af stað. Ég gerði munstur út frá hreindýramosa í nokkrum útfærslum og línuteikningu upp úr venjulegum mosa sem ég stækkaði upp. Þá gerði ég líka munstur út frá smágerðum smjörvíði sem varð þó að stórgerðri línuteikningu,“ segir Margrét og viðurkennir að vera „alltaf með nefið ofan í jörðinni“.

„Ég hef tekið ljósmyndir af náttúrunni í áratugi og mun líklega alltaf leita innblásturs í hana.“

Margrét leggur áherslu á munsturgerð og þó hún saumi sjálf löberana segist hún ekki ætla að einskorða sig við borðdúka.

„Gola mun ekki endilega snúast um textílvörur heldur allt mögulegt en stefnan er að selja munstruð efnin í metratali. Þá getur fólk saumað úr því það sem það vill. Ég reyni að hanna alltaf mismunandi útgáfur svo fleiri finni eitthvað sem hentar. Núna er ég að þróa nýtt munstur upp úr mosanum sem verður frekar dökkt.“

Margrét lærði textílhönnun við LHÍ og kenndi um tíma munsturgerð við skólann. Henni er umhugað um að munsturgerð og textílprentun festi sig í sessi hér á landi og er með námskeið í munsturgerð í bígerð.

„Ég veit ekki til þess að neinn annar sé að hanna munstur á efni og selja í metravís á landinu í dag en á námskeiðinu langar mig að kenna fólki að vinna eigin munstur sem það getur svo látið prenta,“ segir hún.

Nánar má forvitnast um hönnun Margrétar á gola.is.